साताऱ्यात भंगाराच्या दुकानात पोलिसांना सापडला गांजा ; मुद्देमाल जप्त ; गुन्हा दाखल

वेध माझा ऑनलाइन - सातारा पोलिसांनी जिल्हयामध्ये अंमलीपदार्थ विरोधी केसेस करण्याच्या पार्श्वभूमीवर सातारा पोलीस अधीक्षक समीर शेख, अपर पोलीस अधीक्षक अजित बो-हाडे यांच्या सूचनेनुसार सातारा स्थानिक गुन्हे शाखेचे पोलीस निरीक्षक अरुण देवकर यांनी सपोनि रमेश गर्जे यांच्या अधिपत्याखाली एक विशेष पथक तयार केले आहे. या पथकाने गांजा प्रकरणात परशुराम रामफेर ठाकूर (वय- 35 वर्षे, रा. 125, रघुनाथ पुरा करंजे सातारा) या संशयित आरोपीस ताब्यात घेतले आहे.पोलिस अधीक्षक समीर शेख यांना मिळालेल्या बातमीनुसार वाढेफाटा सातारा येथे एका भंगाराच्या दुकानात एका इसमाने गांजाच्या झाडांची लागवड करुन जोपासना केलेली आहे.

पोलिसांनी दिलेली माहिती अशी, पोलिस अधीक्षक समीर शेख यांना मिळालेल्या बातमीनुसार वाढेफाटा सातारा येथे एका भंगाराच्या दुकानात एका इसमाने गांजाच्या झाडांची लागवड करुन जोपासना केलेली आहे. पोलिस निरीक्षक अरुण देवकर यांनी सदर ठिकाणी जावून छापा कारवाई करण्याचे आदेश दिले. त्याप्रमाणे दि. 3/ 11/2022 रोजी स्थानिक गुन्हे शाखेकडील पथकाने वाढेफाटा- सातारा येथील जय दुर्गामाता स्क्रॅप मर्चंट या दुकानामध्ये छापा टाकला. दुकानाच्या परिसरात लागवड करुन जोपासना केलेली “गांजा” या अंमली पदार्थाची एकुण 4 झाडे वजन 20.880 कि.ग्रॅम कि.रु. 5 लाख 22 हजाराचा माल जप्त करण्यात आला. सातारा शहर पोलीसात याबाबत गुन्हा दाखल करण्यात आला आहे.