यावेळी सेंद्रिय शेतीसाठी आंतरराष्ट्रीय सक्षमता केंद्र, बेंगलोरच्या व्यवस्थापिका जे. बी. अनिता, कृष्णा कृषी परिषदचे अध्यक्ष गजेंद्र पाटील, कृष्णा कारखाना कार्यकारी संचालक राम पाटील, कृष्णा कृषी परिषदचे संचालक धनंजय पाटील उपस्थित होते.
या आंतरराष्ट्रीय महोत्सवात 400 हून अधिक स्टॉल असणारा असून यामधील 40 स्टॉल हे शासनाच्या विविध विभागांना राखीव ठेवण्यात आले असून 60 स्टॉलवर शेती संदर्भातील आधुनिक मशनरी असणार आहेत तर 120 स्टॉलवर शेतकरी, विविध कंपन्या, शेतीच्या अनुषंगाने विविध प्रकारचे माहिती या स्टॉलवर उपलब्ध होणार आहे. पंधराहून अधिक स्टॉल हे विविध देशांसाठी देण्यात आले आहेत.
आजच्या बदलत्या तंत्रज्ञानामुळे कृषीक्षेत्रात नवनवीन आव्हाने निर्माण होत आहेत. अशा परिस्थितीत आपल्या भागातील शेतकऱ्यांना जगभरात कृषी क्षेत्रात सुरु असलेल्या नव्या तंत्रज्ञानाची, नव्या संशोधनाची, नव्या उत्पादनांची माहिती एकाच छताखाली उपलब्ध व्हावी, यासाठी कृष्णा सहकारी साखर कारखाना पुरस्कृत कृष्णा कृषी परिषदेच्या माध्यमातून आणि कृष्णा उद्योग समूहाच्या सहकार्यातून भव्य अशा कृष्णा कृषी व औद्योगिक महोत्सवाचे आयोजन करण्यात आले आहे. कराडमधील हा पहिला आंतरराष्ट्रीय कृषी महोत्सव आहे.
शेतकरी व नागरिकांना शासनाच्या विविध कृषी योजना व उपक्रमांची माहिती, संशोधित कृषी तंत्रज्ञान, प्रयोगशील शेतकऱ्यांचे नाविन्यपूर्ण अनुभव, बाजारपेठ व्यवस्थापन, कृषीपूरक व्यवसाय इत्यादीबाबतचे मार्गदर्शन व्हावे व यशस्वी शेतकरी, कृषी शास्त्रज्ञ, कृषी तंत्रज्ञ आणि कृषी तज्ज्ञांशी थेट संवाद साधण्याची संधीदेखील यानिमित्ताने उपलब्ध होणार आहे.
पाच दिवस चालणाऱ्या या महोत्सवात देश विदेशातील विविध नामांकित कंपन्यांचा सहभाग असून, कृषी यंत्रसामुग्री, नर्सरी व ग्राफ्टेड प्लान्ट, कृषी तंत्रज्ञान, अन्नप्रक्रिया दालन, धान्य महोत्सव, लघुउद्योग, यशोगाथा, शासकीय विभाग, महिला बचत गट आदींचे 400 हून अधिक स्टॉल, आंतरराष्ट्रीय फ्लॉवर शो, आंतरराष्ट्रीय फ्रूट शो, व्हेजिटेबल शो, प्रात्यक्षिके, परिसंवाद, आदर्श गाव असे विविधांगी कार्यक्रम आयोजित करण्यात येणार आहेत.
या महोत्सवात विविध देशांमधील भाजीपाल्याचे लाईव्ह सॅम्पल्स व पिके ठेवण्यात येणार आहेत. महोत्सवात शेतकऱ्यांबरोबरच प्रदर्शन बघायला येणाऱ्या ग्राहकांना शेतकरी ते थेट ग्राहक विक्रीच्या संकल्पनेतून तांदूळ, गहू, ज्वारी, कडधान्य, बेदाणा, हळद, मसाले खरेदी करता येणार आहेत. त्यासाठी धान्य महोत्सवात विशेष दालन उभारणी करुन, त्यामध्ये शेतकऱ्यांचे स्टॉल लावले जाणार आहेत.
महाराष्ट्र शासनाचा कृषी विभाग, सातारा जिल्हा परिषद, महाराष्ट्र राज्य पणन मंडळ, बियाणे महामंडळ, कृषी औद्योगिक विकास महामंडळ, वखार महामंडळ, उद्योग विकास महामंडळ, अण्णासाहेब पाटील आर्थिक विकास महामंडळ अशा शासकीय संस्थांचा या महोत्सवात विशेष सहभाग राहणार असून, राज्य व केंद्र शासनाच्या अनेक लोकाभिमुख योजनांचे विशेष दालन याठिकाणी साकारले जाणार आहेत. या माध्यमातून शेतकऱ्यांना शासनाच्या विविध विभागांची व योजनांची माहिती प्राप्त करुन घेता येणार आहे.
या महोत्सवात ऑरगॅनिक फार्मिंग, व्हर्टीकल फार्मिंग, संरक्षित शेती, बिनमातीची शेती, ड्रोन फवारणीसह अन्य कृषी औद्योगिक साधनांची प्रात्यक्षिकेही यावेळी सादर केली जाणार आहेत. विविध देशातील तज्ञ यावेळी प्रत्यक्ष शेती बद्दलची माहिती देणार आहेत.प्रदर्शनामध्ये पीक स्पर्धा, पुष्प स्पर्धा, खाद्य महोत्सव आयोजित करण्यात आला आहे. तसेच तीन दिवस विविध सांस्कृतिक कार्यक्रमांचे आयोजन करण्यात येणार असून, त्यासाठी भव्य शामियाना महोत्सवस्थळी उभारण्यात येणार आहे.
राज्यात विविध ठिकाणी अशा प्रदर्शनाचे महोत्सवांचे आयोजन करणाऱ्या शुअर शॉट व स्मार्ट एक्सपो इव्हेंट मॅनेजमेंट कंपनीच्या वतीने या महोत्सवाचे आयोजन करण्यात आले असून मोठ्या प्रमाणात यामध्ये सहभागी होण्याचे आवाहनही या मॅनेजमेंटचे प्रमुख संदीप गिड्डे -पाटील यांनी केले आहे.
No comments:
Post a Comment