एसटी बँकचे 18 पैकी 12 संचालक आज शिंदेंच्या शिवसेनेमध्ये प्रवेश करणार ; गुणरत्न सदावर्ते याना शह देण्याचा प्रयत्न , भाजप शिवसेनेमध्ये वाद होण्याची शक्यता !

वेध माझा ऑनलाईन।

ज्येष्ठ वकील गुणरत्न सदावर्ते यांना शह देण्याचा प्रयत्न उपमुख्यमंत्री एकनाथ शिंदे यांच्या शिवसेनेकडून होतोय का? असा प्रश्न आता विचारला जात आहे. कारण एसटी बँकचे 12 संचालक आज शिवसेनेमध्ये प्रवेश करणार असल्याची माहिती विश्वसनीय सूत्रांनी दिली आहे. दरम्यान 18 पैकी 12 संचालक शिवसेनेच्या गळाला लागल्याचे चर्चेनं शिंदे गटानं ऑपरेशन लोटस राबवत एकप्रकारे  गुणरत्न सदावर्तेंना झटका दिल्याचे बोललं जात आहे.  गुणरत्न सदावर्ते आणि त्यांच्या पत्नी जयश्री पाटील यांना मोठा दणका दिला असून एसटी को-ऑपरेटिव्ह बँकेच्या संचालकपदावरून दोघांचीही गच्छंती करण्यात आली आहे.

तर दुसरीकडे संचालक फोडाफोडीमुळे शिवसेना आणि भाजपमध्ये वादाची शक्यता ही वर्तवली जात आहे. गुणरत्न सदावर्ते आणि देवेंद्र फडणवीस यांची जवळीकता लक्षात घेता नव्या वादाला तोंड फुटण्याची शक्यता आहे.