गणेशोत्सवाच्या उत्साहाने कराड शहर आणि परिसर भक्तिमय झाला असताना सार्वजनिक गणेश मंडळांच्या आरत्या, दर्शन आणि विविध कार्यक्रमांना राजकीय-सामाजिक क्षेत्रातील मान्यवरांची उपस्थितीही पाहायला मिळत आहे. आमदार अतुलबाबा भोसले यांच्या हस्ते शहरातील विविध गणेश मंडळांमध्ये आरतीचे कार्यक्रम सुरू असतानाच, आज राज्याचे सार्वजनिक बांधकाम मंत्री शिवेंद्रसिंहराजे भोसले यांनीही कराड शहरातील गणेश मंडळांना भेटी देत गणरायाची आरती केली.
विशेष म्हणजे, शिवेंद्रसिंहराजे भोसले आणि आमदार अतुलबाबा भोसले यांनी शहरातील विविध गणेश मंडळांना दुचाकीवरून फिरत भेटी देत कार्यकर्ते आणि सर्वसामान्य नागरिकांशी थेट संवाद साधला. मोठा ताफा किंवा औपचारिक स्वागतापेक्षा गणेशोत्सवाच्या वातावरणात सामान्य नागरिकांमध्ये मिसळण्याच्या या पद्धतीची सध्या शहरातील गणेश मंडळांमध्ये चर्चा रंगली आहे.
गणेश मंडळात पोहोचल्यानंतर आरतीमध्ये सहभागी होणे, कार्यकर्ते व नागरिकांशी संवाद साधणे, गणेशभक्तांच्या शुभेच्छा स्वीकारणे आणि त्यांच्यासोबत काही क्षण घालवणे, यामुळे दोन्ही नेत्यांनी आपुलकीचा संदेश दिल्याचे मंडळांच्या कार्यकर्त्यांकडून बोलले जात आहे.
सातारा जिल्ह्यात भाजपचे प्रमुख नेते म्हणून शिवेंद्रसिंहराजे भोसले आणि अतुलबाबा भोसले यांची स्वतंत्र राजकीय ओळख आहे. सातारा परिसरात शिवेंद्रसिंहराजे तर कराडमध्ये अतुलबाबा भोसले, अशी स्थानिक राजकीय वर्तुळात चर्चा होत असते. मात्र गणेशोत्सवासारख्या सार्वजनिक आणि धार्मिक उत्सवाच्या निमित्ताने दोन्ही नेते नागरिकांमध्ये प्रत्यक्ष मिसळताना दिसल्याने त्यांच्या या शैलीची चर्चा आता गणेश मंडळांमध्येही होत आहे.
गणेशोत्सव हा केवळ धार्मिक उत्सव न राहता सामाजिक एकोपा, आपुलकी आणि नागरिकांशी संवाद साधण्याचे माध्यम ठरतो. त्याच पार्श्वभूमीवर नेते आणि सामान्य नागरिक यांच्यातील अंतर कमी करणाऱ्या या भेटींना विशेष महत्त्व प्राप्त झाले आहे. कराडच्या गणेश मंडळांमध्ये सध्या आरतीसोबतच या दोन्ही नेत्यांच्या साधेपणाच्या शैलीचीही चर्चा रंगताना दिसत आहे.
No comments:
Post a Comment