सरन्यायाधीश धनंजय चंद्रचूड यांनी विधानसभा अध्यक्ष राहुल नार्वेकर यांची सर्वोच्च न्यायालयात बाजू मांडणारे सॉलिसिटर जनरल तुषार मेहता यांनाही स्पष्ट शब्दांत सुनावले आहे. तसेच, अपात्रता प्रकरणावरील सुनावणीसाठी विधानसभा अध्यक्ष राहुल नार्वेकरांनी ठरवलेल्या वेळापत्रकावरही सरन्यायाधीशांनी ताशेरे ओढले आहेत. ‘कायदा तुम्हाला बसवून शिकवावा लागेल,’ असेही सरन्यायाधीशांनी सुनावले.
‘आम्ही हे जाणतो की विधानसभा अध्यक्षांचं पद हे संसदीय सरकारचा भाग आहे, त्यामुळेच आम्ही कुठलीही टाईमफ्रेम देत नाही, पण ते वेळेत निर्णय देत नसतील तर त्यांना जबाबदार धरावेच लागेल,’ असेही सरन्यायाधीशांनी म्हटले आहे. ‘जर निश्चित वेळापत्रक विधानसभा अध्यक्षांकडून आलं नाही, तर मात्र आम्हाला आदेश द्यावे लागतील आणि त्यानंतर ठरवून दिलेल्या मर्यादेत अध्यक्षांना निर्णय द्यावाच लागेल,’ असेही सरन्यायाधीश म्हणाले.
दरम्यान, शिवसेना आणि राष्ट्रवादी यांची शुक्रवारी एकत्र सुनावणी असल्याने शिवसेनेचे आमदार अनिल परब, खासदार अनिल देसाई, राष्ट्रवादी कॉँग्रेसच्या खासदार सुप्रिया सुळे, आमदार डॉ. जितेंद्र आव्हाड आदी यावेळी सुप्रिम कोर्टात उपस्थित होते
दरम्यान ‘अध्यक्षांचं वेळापत्रक आम्हाला अजिबात मान्य नाही,’ असं म्हणत सरन्यायाधीश चंद्रचूड यांनी विधानसभा अध्यक्ष आणि त्यांच्या कार्यपद्धतीबाबत प्रचंड नाराज व्यक्त केली. ‘फक्त वेळकाढूपणाचे धोरण अध्यक्ष राबवत असल्याचे प्रथमदर्शनी दिसत आहे,’ असं सरन्यायाधीशांनी म्हटले आहे.
No comments:
Post a Comment