आज भूकंपाचा सौम्य धक्क जाणवला : भूकंपाचे केंद्र सातारा जिल्ह्यात ; किती वाजता आणि कुठे हा धक्का जाणवला ? तीव्रता किती ?

वेध माझा ऑनलाइन।

जिल्ह्यात आज पहाटे ३ वाजून २९ मिनिटांनी भूकंपाचा सौम्य धक्का जाणवला. राष्ट्रीय भूकंपशास्त्र केंद्राच्या नोंदीनुसार या भूकंपाची तीव्रता 2.4 रिश्टर इतकी होती. भूकंपाचे केंद्र सातारा जिल्ह्यात असून ते 17.373 अंश उत्तर अक्षांश आणि 73.769 अंश पूर्व रेखांशावर नोंदविण्यात आले आहे.

या भूकंपाची खोली जमिनीखाली सुमारे 5 किलोमीटर होती. पहाटेच्या वेळी भूकंपाची नोंद झाल्याने काही नागरिकांना परिसरात सौम्य हादरे जाणवल्याची शक्यता आहे. मात्र, या भूकंपामुळे कोणतीही जीवितहानी अथवा मोठ्या प्रमाणावर वित्तहानी झाल्याची माहिती अद्याप मिळालेली नाही. भूकंपाची तीव्रता कमी असल्याने त्याचा परिणाम मर्यादित राहिला.

जिल्ह्यात यापूर्वीही अधूनमधून सौम्य स्वरूपाचे भूकंप नोंदविण्यात आले आहेत. त्यामुळे नागरिकांनी घाबरून न जाता अधिकृत यंत्रणांकडून मिळणाऱ्या माहितीवर विश्वास ठेवावा, असे आवाहन करण्यात येत आहे. राष्ट्रीय भूकंपशास्त्र केंद्राच्या संकेतस्थळावर तसेच ‘भूकंप’ ॲपवर या भूकंपाची नोंद उपलब्ध करण्यात आली आहे. भूकंपाच्या पार्श्वभूमीवर प्रशासन व संबंधित यंत्रणा परिस्थितीवर लक्ष ठेवून आहेत.

आता खेळाडूंची गैरसोय होणार दूर! नरेंद्र लिबे यांचे प्रयत्न झाले सक्सेस! नगराध्यक्ष राजेंद्रसिंह यादव यांचा पुढाकार; वेध माझा चा पाठपुरावा ; ओपन स्पेसमधील मैदान तात्पुरते सरावासाठी उपलब्ध ; नगरसेवक नरेंद्र लिबे यांची प्रत्यक्ष पाहणी; मैदानाची साफसफाई व तयारीला वेग

वेध माझा ऑनलाईन।

कराड शहरातील छत्रपती शिवाजी महाराज स्टेडियमचे काम सुरू असल्यामुळे खेळाडूंना सराव व विविध खेळांसाठी मैदान उपलब्ध होत नव्हते. त्यामुळे खेळाडूंची होणारी गैरसोय लक्षात घेऊन नगरसेवक व स्वतः राष्टीय खेळाडू असलेले नरेंद्र लिबे यांनी याबाबत आवाज उठवला होता 

त्यासंदर्भात काल त्यांनी वेध-माझा शी बातचीत केली होती वरच्या दर्जाचा खेळाडू सरावासाठी मैदान उपलब्ध नसल्याने जिल्हा स्तरावर देखील पोहोचू शकत नसल्याची खंत त्यांनी बोलून दाखवली होती.

त्यांनतर वेध-माझा ने याबाबतची बातमी प्रसिद्ध केली होती...त्यानुसार या विषयाचा पाठपुरावा करत आज लग्गेच याबाबतचा निर्णय झाल्याचे नगरसेवक लिबे यांनी वेध-माझा शी बोलताना आज सांगितले 

लोकनियुक्त नगराध्यक्ष राजेंद्रसिंह यादव यांनी पुढाकार घेत कराड नगरपरिषद हद्दीतील श्री हॉस्पिटल समोरील मोकळी जागा स्टेडियमचे काम पूर्ण होईपर्यंत तात्पुरत्या स्वरूपात खेळाडूंसाठी उपलब्ध करून देण्याचा निर्णय घेतला आहे.

मैदान उपलब्ध करून देण्याच्या मागणीसाठी खेळाडूंनी नगराध्यक्ष यादव यांची भेट घेतली होती. यावेळी नगरसेवक नरेंद्र लिबे यांनी स्वतः खेळाडू असल्याने याबाबतची अडचण समजून घेत ती नगराध्यक्षांच्या निदर्शनास आणून दिली. खेळाडूंना सरावासाठी जागा मिळणे आवश्यक असल्याचे लक्षात घेऊन नगराध्यक्ष यादव यांनी तत्काळ सकारात्मक निर्णय घेतला.

दरम्यान, आज सकाळी उपलब्ध करून देण्यात आलेल्या मैदानाची साफसफाई व आवश्यक तयारी करताना नगरसेवक नरेंद्र लिबे यांनी स्वतः उपस्थित राहून संबंधितांना सूचना दिल्या. 

यावेळी नरेंद्र लिबे यांच्यासह महेंद्र भोसले सर अतुल पाटील, दिलीप चिंचकर, हनमंत साखरे आदी खेळाडू उपस्थित होते

खेळाडूंना सरावासाठी मैदान योग्य पद्धतीने तयार करण्याबाबतही त्यांनी मार्गदर्शन केले.

स्टेडियमचे काम पूर्ण होईपर्यंत खेळाडूंचा सराव खंडित होऊ नये, या उद्देशाने नगरपरिषदेने घेतलेल्या या निर्णयामुळे शहरातील खेळाडूंना मोठा दिलासा मिळाला आहे. 

“मैदानाचे काम सुरू असले तरी खेळाडूंचा सराव थांबता कामा नये; खेळाडूंना आवश्यक सुविधा उपलब्ध करून देणे ही आपली जबाबदारी आहे,” अशी भावना यावेळी व्यक्त करण्यात आली.

माजी मंत्री बाळासाहेब पाटील यांचं भाजपा आमदार मनोज घोरपडे व धैर्यशील कदम यांना थेट आव्हान ; म्हणाले...निवडणूक अर्जासोबतच्या शपथपत्रात मी माझ्या संपत्तीचा तपशील दिलेला आहे, सरकार तूमचे आहे, मग लावा माझी चौकशी;

वेध माझा ऑनलाईन।

सह्याद्री कारखान्याच्या नुकत्याच झालेल्या वार्षिक सर्वसाधारण सभेत माझ्यावर वैयक्तिक आरोप करून लोकांमध्ये संभ्रम निर्माण करायचा प्रयत्न केला. निवडणूक अर्जासोबतच्या शपथपत्रात मी माझ्या संपत्तीचा तपशील दिलेला आहे. सरकार तुमचं आहे, म्हणता तर मग लावा माझी चौकशी, असं थेट आव्हान बाळासाहेब पाटील यांनी भाजपा आमदार मनोज घोरपडे आणि धैर्यशील कदम यांना दिलं.

सह्याद्री सहकारी साखर कारखान्याच्या बॉयलर अग्नी प्रदीपन कार्यक्रमानंतर झालेल्या जाहीर सभेत ते बोलत होते

ते म्हणाले...

आनंदराव जाधव, विठ्ठलतात्या जाधव, राजाभाऊ देशपांडे यांच्यासारखे ज्येष्ठ सभासद वार्षिक सभेत प्रश्न विचारायचे.

त्यावेळी तीन तीन तास सभा चालायची त्यांच्यासाठी स्वतंत्र मंडप आणि माईकची व्यवस्था केली जायची. त्या परंपरेला यंदा छेद देण्याचा प्रयत्न झाला. याचा अर्थ एकच आहे की उत्तरे तुम्हाला ऐकायची नव्हती. कारखान्यावर काहीतरी आरोप करायचा, अशा प्रकारची विरोधकांची वृत्ती होती, असा आरोप बाळासाहेब पाटील यांनी केला.

आपण संयम ठेवला पाहिजे. आपल्याला संस्था चालवायची आहे. पुढे जायचे आहे,

आपण एका मर्यादेपर्यंत संयम ठेवला. अंगावर आल्यावर आपण बघूच... असा सूचक इशारा माजी सहकार मंत्री बाळासाहेब पाटील यांनी याच दोन्ही भाजपा आमदारांना दिला.

यंदा सह्याद्री कारखाना पूर्ण क्षमतेने चालवणार आहोत  प्रतिदिन 11 हजार टनापेक्षाही अधिक गळीत आपण करणार आहोत असेही ते म्हणाले

क्रीडा नगरीतच खेळाडूंच्या विजयाला ‘ब्रेक’! नवे स्टेडियम उभे राहतेय; पण तोपर्यंत खेळाडूंनी सराव करायचा कुठे? तंत्रशुद्ध सरावावर होतोय परिणाम; स्पर्धांमधील कामगिरी घसरल्याची क्रीडा क्षेत्रात खंत ;

वेध माझा ऑनलाईन।

ऑलिंपिकवीर खाशाबा जाधव यांच्यासारख्या दिग्गज मल्लांनी ज्या कराडच्या मातीत सराव केला, ज्या भूमीने राष्ट्रीय-आंतरराष्ट्रीय दर्जाचे असंख्य खेळाडू घडविले, त्या क्रीडा नगरीतच आज खेळाडूंना सरावासाठी मैदान शोधण्याची वेळ आली आहे! कराडच्या छत्रपती शिवाजी महाराज स्टेडियमचे काम सुरू असल्याने खेळाडूंसाठी पर्यायी मैदान उपलब्ध नसल्याचा थेट फटका त्यांच्या सरावाला आणि स्पर्धेतील कामगिरीला बसत असल्याची खंत क्रीडा क्षेत्रातून व्यक्त होत आहे.

कराडमध्ये नवीन स्टेडियम उभारण्याचे काम सुरू आहे. भविष्यातील क्रीडा विकासाच्या दृष्टीने ही बाब महत्त्वाची असली तरी आजचा खेळाडू उद्याच्या स्टेडियमची वाट पाहत बसू शकत नाही. त्याला आज मैदान हवे, आज सराव हवा आणि आजच स्पर्धेसाठी तयारी हवी. मात्र, तात्पुरत्या स्वरूपातही पुरेसे मैदान उपलब्ध नसल्याने खेळाडूंची मोठी अडचण निर्माण झाली आहे.

मैदान म्हणजे खेळाडूच्या मेहनतीचे, तंत्राचे आणि भविष्यातील यशाचे ते व्यासपीठ असते. नियमित आणि तंत्रशुद्ध सरावाअभावी खेळाडूंच्या तयारीवर परिणाम होत असून त्याचा फटका स्पर्धांच्या निकालातही जाणवत असल्याची भावना क्रीडाप्रेमींमधून व्यक्त होत आहे.

विशेष म्हणजे,  राष्ट्रीय स्तरावर पदके मिळविणारे आणि कराडचे नाव उज्ज्वल करणारे काही खेळाडू आज मैदानाअभावी जिल्हास्तरीय स्पर्धेतही अपेक्षित कामगिरी करू शकत नसल्याची खंत व्यक्त होत आहे. वरच्या स्तरावर बक्षीस मिळविणाऱ्या खेळाडूंना जिल्हास्तरावरच संघर्ष करावा लागणे ही परिस्थिती कराडसारख्या ऐतिहासिक क्रीडा नगरीला निश्चितच शोभणारी नाही.

खेळाडूंमध्ये गुणवत्ता आहे, मेहनत करण्याची तयारी आहे, प्रशिक्षकांचे मार्गदर्शन आहे मग अडथळा नेमका कुठे आहे? मैदानाचा! हा अडथळा दूर करण्यासाठी तात्पुरते का होईना, पर्यायी मैदान उपलब्ध करून देण्याची गरज आहे.

“स्टेडियमचे काम पूर्ण होईपर्यंत खेळाडूंनी थांबायचे का?” असा सवाल आता क्रीडाप्रेमी उपस्थित करीत आहेत. लोकप्रतिनिधींनी या प्रश्नात तातडीने लक्ष घालून नगरपालिका, क्रीडा विभाग आणि संबंधित यंत्रणांशी समन्वय साधत खेळाडूंसाठी पर्यायी मैदान उपलब्ध करून देण्यासाठी पुढाकार घ्यावा, अशी मागणी होत आहे.

कराडची क्रीडा परंपरा ही केवळ भूतकाळाची आठवण नाही ही परंपरा पुढे नेण्यासाठी आजच्या खेळाडूंना मैदान मिळणे आवश्यक आहे. नवीन स्टेडियमच्या कामाचे स्वागतच पण त्या कामाच्या काळात खेळाडूंच्या कारकिर्दीला ‘ब्रेक’ लागता कामा नये, एवढीच अपेक्षा

नगरसेवक 

राष्ट्रीय खेळाडू नरेंद्र लिबे म्हणाले...

स्टेडियमचे काम सुरू आहे, ठीक आहे...

पण खेळाडूंनी सराव करायचा कुठे?

राष्ट्रीय स्तरावर पदक मिळविणाऱ्या खेळाडूंना आज जिल्हास्तरावरच थांबावे लागत असेल, तर ही कराडच्या क्रीडा नगरीसाठी धोक्याची घंटा नाही का? असा सवाल खेळाडू व नगरसेवक नरेंद्र लिबे यांनी याविषयी बोलताना केला

पुन्हा एकदा भाजपने दिला काँग्रेसला मोठा धक्का काँग्रेसचा आणखी एक नेता भाजपच्या गळाला ;

वेध माझा ऑनलाइन

मोठी बातमी समोर येत आहे, विधानसभा निवडणुकीनंतर महाविकास आघाडीला धक्क्यावर धक्के सुरूच आहेत. आता पुन्हा एकदा भाजपने काँग्रेसला मोठा धक्का दिला आहे. काँग्रेसचा आणखी एक नेता भाजपमध्ये प्रवेश करणार आहे. हा काँग्रेस पक्षासाठी तसेच प्रदेशाध्यक्ष हर्षवर्धन सपकाळ यांच्यासाठी मोठा धक्का मानला जात आहे. बुलढाणा जिल्ह्याच्या तसेच चिखलीच्या राजकारणात मोठी राजकीय घडामोड समोर आली आहे. काँग्रेस प्रदेशाध्यक्ष हर्षवर्धन सपकाळ यांचे शिलेदार असलेले माजी आमदार तथा काँग्रेसचे माजी जिल्हाध्यक्ष राहुल बोंद्रे हे भाजपच्या गळाला लागले असून, लवकरच भाजपमध्ये प्रवेश करणार आहेत.

राहुल बोंद्रे यांनी स्वतः त्यांच्या फेसबुक पोस्टद्वारे ही माहिती दिली आहे.  काँग्रेस पक्षाने आपल्या सामाजिक आणि राजकीय प्रवासात अनेक संधी आणि पदे दिली, तसेच जिवाभावाची अनेक माणसं दिली, असे सांगत बोंद्रे यांनी काँग्रेससोबतच्या आपल्या प्रदीर्घ प्रवासाच्या आठवणींना यावेळी उजाळा दिला.  मुकुल वासनिक यांनी आपल्या राजकीय वाटचालीची सुरुवात करून दिली आणि अत्यंत प्रेम व मार्गदर्शन दिले, तर हर्षवर्धन सपकाळ यांनी भावाप्रमाणे प्रेम दिल्याचेही बोंद्रे यांनी आपल्या पोस्टमध्ये नमूद केले आहे. मात्र आता राजकीय वळणावर आपण भारतीय जनता पक्षात प्रवेश करण्याचा निर्णय घेतला असल्याचे राहुल बोंद्रे यांनी या पोस्टमध्ये स्पष्ट केले आहे.

कोयना सहकारी बँकेच्या उंब्रज शाखेचे बुधवारी उद्घाटन ; भाजपचे आमदार मनोज घोरपडे,धैर्यशील कदम हे राहणार उपस्थित; सुरेश भोसले यांच्या हस्ते होणार उद्घाटन ;

वेध माझा ऑनलाईन।

कोयना सहकारी बँक लि., कराडच्या उंब्रज शाखेचे बुधवार, दि. २३ सप्टेंबर २०२६ रोजी सायंकाळी ४ वाजता कृषी उत्पन्न बाजार समिती परिसर, उंब्रज, ता. कराड येथे स्थलांतर करण्यात येणार आहे. या स्थलांतर समारंभाचा शुभारंभ यशवंतराव मोहिते कृष्णा सहकारी साखर कारखाना, रेठरे बुद्रुकचे चेअरमन तथा कृष्णा उद्योग समूहाचे कुटुंबप्रमुख मा. डॉ. सुरेश भोसले (बाबा) यांच्या प्रमुख उपस्थितीत होणार आहे. या कार्यक्रमास कराड उत्तरचे आमदार मा. मनोजदादा घोरपडे, विधानपरिषद सदस्य मा. आ. धैर्यशील कदम, कोयना सहकारी बँकेचे संस्थापक अध्यक्ष व जिल्हा परिषद सदस्य मा. ॲड. उदयसिंह पाटील (दादा) तसेच युवा नेते मा. आदिराज पाटील (बाबा) यांची प्रमुख उपस्थिती राहणार आहे.

उंब्रज व परिसरातील सभासद, खातेदार, व्यापारी, उद्योजक, शेतकरी तसेच नागरिकांना अधिक चांगल्या बँकिंग सुविधा उपलब्ध करून देण्याच्या उद्देशाने शाखेचे स्थलांतर करण्यात येत आहे. नव्या जागेमुळे ग्राहकांना अधिक सुलभ, प्रशस्त व सोयीस्कर वातावरणात बँकिंग सेवा उपलब्ध होणार आहेत.

बदलत्या काळानुसार आधुनिक बँकिंग सेवा, डिजिटल सुविधा आणि ग्राहकाभिमुख सेवा देण्यावर बँकेचा विशेष भर असून, उंब्रज शाखेच्या स्थलांतरामुळे या परिसरातील ग्राहकांना त्याचा अधिक लाभ मिळणार आहे.

उंब्रज व परिसरातील सर्व सभासद, खातेदार, ग्राहक, व्यापारी, शेतकरी आणि नागरिकांनी या स्थलांतर समारंभास उपस्थित राहून कार्यक्रमाची शोभा वाढवावी, असे आवाहन बँकेचे अध्यक्ष कृष्णत पाटील, उपाध्यक्ष साहेबराव शेवाळे व संचालक मंडळाने केले आहे.

                

हिरण्यकश्यपू वधाचा थरार अनुभवण्यासाठी आझाद चौकात रेकॉर्डब्रेक गर्दी!

वेध माझा ऑनलाईन।

गणेशोत्सवाच्या पार्श्वभूमीवर नवजवान गणेश मंडळ, आझाद चौक यांच्या वतीने साकारण्यात आलेल्या ‘नरसिंह अवतार’ या जिवंत देखाव्याला कराडकरांचा उत्स्फूर्त प्रतिसाद मिळत असून, देखावा पाहण्यासाठी दररोज रेकॉर्डब्रेक गर्दी होत आहे. विशेषतः भगवान नरसिंहांनी भक्त प्रल्हादाच्या रक्षणासाठी घेतलेला अवतार आणि हिरण्यकश्यपूचा केलेला वध हा प्रसंग पाहण्यासाठी भाविकांची मोठी गर्दी होत आहे.

गणेशोत्सवाच्या माध्यमातून धार्मिक परंपरा, संस्कार आणि सामाजिक संदेश देण्याचा प्रयत्न नवजवान गणेश मंडळाने केला असून, ‘नरसिंह अवतार’ हा जिवंत देखावा कराड शहरातील गणेशोत्सवाचे विशेष आकर्षण ठरत आहे.

वैभव भोसले, अतुल पाडळे, रितेश नलवडे, कृष्णा काटवटे, श्रीधर मुळे, सिद्धप्रसाद मुळे, अंकुश नलवडे, ज्ञानेश्वर भस्मे, विनायक काटकर, बाल कलाकार रुद्र नलवडे यांच्या  या देखाव्यात प्रमुख भूमिका आहेत.