मान्सून आला महाराष्ट्राच्या दारात ...दोन दिवसात सुरू होणार धो...धो...

वेध माझा ऑनलाइन - राज्यात यंदा जोरदार पाऊस पडण्याची शक्यता हवामान खात्याकडून  वर्तवण्यात आली आहे. याचबरोबर राज्यात मान्सूनची चाहूल लागत आहे. राज्यातील कोकण आणि गोव्याच्या सीमेवर मान्सून पुढच्या दोन दिवसांत दाखल होण्याची शक्यता हवामान खात्याकडून वर्तवण्यात आली आहे. दरम्यान राज्यातील अनेक जिल्ह्यात यंदा पाऊस 106 टक्के पडणार आहे. तसेच उर्वरित भागात 99 टक्क्यांपर्यंत पाऊस पडणार असल्याचे सांगण्यात आली आहे.

दरम्यान राज्यातील कोल्हापूर, सातारा, सांगली, सोलापूर जिल्ह्यांसह कर्नाटकातील बेळगावमध्ये पावसाची शक्यता असल्याचे हवामान विभागाने सांगितले आहे. बंगालच्या उपसागरात मान्सूनच्या स्थितीचा प्रभाव अनुकूल राहिल्याने मान्सूनच्या आगमनाला कोणताही अडथळा नसल्याचे सांगण्यात येत आहे. पुढच्या 2 ते 3 दिवसांत मान्सून कोकण आणि गोव्यात पोहोचणार आहे, असा अंदाज हवामानशास्त्र विभागाने वर्तविला आहे. दोन दिवसांपूर्वीच मान्सून केरळच्या किनारपट्टीवर दाखल झाल्यानंतर राज्यातील काही जिल्ह्यात मुसळधार पावसाने सुरुवात झाली होती.