कराड शहरातील विविध महत्त्वाच्या विकासकामांवरून मंगळवारी झालेली नगरपालिकेची सर्वसाधारण सभा चांगलीच वादळी ठरली. सोमवार पेठेतील रस्त्याची रुंदी कमी करण्यापासून ते साडेसहा कोटी रुपयांच्या नेकलेस रोड प्रकल्पापर्यंत विविध विषयांवर सत्ताधारी आणि विरोधी गटांमध्ये जोरदार शाब्दिक चकमक झाली. दरम्यान, प्रेक्षक गॅलरी बंद ठेवण्यात आल्याने भाजप नगरसेवकांनी ती नागरिकांसाठी खुली करण्याची मागणी करत सभागृहात आक्रमक भूमिका घेतली.
नगराध्यक्ष राजेंद्रसिंह यादव यांच्या अध्यक्षतेखाली ही सर्वसाधारण सभा पार पडली. उपनगराध्यक्ष पोपटराव साळुंखे यांच्यासह सर्व नगरसेवक व नगरसेविका उपस्थित होते.
सभेच्या सुरुवातीलाच सोमवार पेठेतील रस्त्याची रुंदी कमी करण्याचा विषय भाजपचे नगरसेवक अजय पावसकर यांनी मांडला. प्रस्तावित रस्त्याच्या रुंदीमुळे काही नागरिकांची घरे बाधित होण्याची शक्यता असल्याने, नागरिकांची घरे वाचविण्यासाठी रस्त्याची रुंदी कमी करावी, अशी मागणी त्यांनी केली. यावर नगराध्यक्ष यादव यांनी संबंधित रस्त्यांचा अभ्यास करून अधिकाऱ्यांनी अहवाल सादर करावा, अशा सूचना दिल्या.
दरम्यान, सभेची प्रेक्षक गॅलरी बंद ठेवण्यात आल्याचे निदर्शनास आल्यानंतर भाजप नगरसेवकांनी आक्रमक भूमिका घेतली. कराडच्या नागरिकांना सभा पाहण्यासाठी गॅलरी खुली करण्यात यावी, अशी मागणी त्यांनी केली. यासाठी नगरसेवकांनी बराच वेळ आग्रह धरला.
‘फालतू’ शब्दावरून सभागृहात गोंधळ
एका विषयावर चर्चा करताना नगरसेवक अल्ताफ शिकलगार यांनी ‘फालतू’ हा शब्द वापरल्याने भाजप नगरसेवकांनी आक्षेप घेतला. ‘शब्द मागे घ्या,’ अशी मागणी करत भाजप नगरसेवकांनी आक्रमक भूमिका घेतल्याने सभागृहात काही काळ जोरदार वादावादी झाली.
यावेळी शिस्त न पाळल्यास निलंबन करण्याचा इशारा नगराध्यक्ष यादव यांनी दिला
नेकलेस रोडवरून सत्ताधारी-विरोधक आमनेसामने
सभेतील सर्वाधिक चर्चेचा विषय ठरला तो साडेसहा कोटी रुपयांच्या नेकलेस रोड प्रकल्पाचा. या प्रकल्पाला विरोध करण्यामागचे कारण काय, असा सवाल भाजप नगरसेवकांनी सत्ताधारी गटाला केला. विरोधी पक्षनेते विजय वाटेगावकर यांनी, ‘आमदार अतुलबाबा भोसले यांनी आणलेली विकासकामे तुम्हाला करायची नाहीत का?’ असा सवाल उपस्थित करत सत्ताधाऱ्यांकडून खुलासा मागितला. त्यावरून सत्ताधारी आणि विरोधी गटांमध्ये जोरदार शाब्दिक चकमक झाली.
नेकलेस रोड व पर्यटन विकास प्रकल्पाबाबत अधिकृत शासकीय विभागाकडून अद्याप स्पष्टता झालेली नसल्याचे नगराध्यक्ष यादव यांनी सांगितले. पालिकेने वारंवार मागणी करूनही संबंधित प्रकल्पाचे प्रेझेंटेशन सादर करण्यात आलेले नाही. त्यामुळे हा विषय सध्या तहकूब करण्यात येत असल्याचे त्यांनी स्पष्ट केले.
यावर वाटेगावकर यांनी, ‘आमदारांनी दिलेले प्रकल्प आणि निधी वापरायचाच नाही, असे काही ठरले आहे का?’ असा प्रतिप्रश्न केला. त्यावरून पुन्हा दोन्ही गटांमध्ये शाब्दिक वाद रंगला.
नगराध्यक्ष यादव यांनी हस्तक्षेप करत हा साडेसहा कोटी रुपयांचा प्रकल्प असून संवेदनशील विषय असल्याने सध्या तो तहकूब करण्यात येत असल्याचे स्पष्ट केले. यावेळी भाजप नगरसेवकांनी प्रकल्पाला आपली मंजुरी असल्याचे सांगितले. मात्र सत्ताधारी गटाने विषय तहकूब केला.
१.२० कोटींच्या बागेचा विषयही तहकूब
मंगळवार पेठेतील मोकळ्या भूखंडावर सुमारे १ कोटी २० लाख रुपये खर्चून बाग विकसित करण्याच्या प्रस्तावावरही सभेत चर्चा झाली. भाजप नगरसेवकांनी बाग विकसित करण्यास कोणताही विरोध नसल्याचे स्पष्ट करत विषयाला समर्थन दिले.
मात्र, संबंधित जागेवर भविष्यात शॉपिंग कॉम्प्लेक्स उभारल्यास पालिकेला कायमस्वरूपी उत्पन्नाचा स्रोत उपलब्ध होऊ शकतो, अशी भूमिका सत्ताधारी गटाने मांडली. त्यामुळे या विषयावर अधिक विचारविनिमय करण्यासाठी तो तहकूब करण्यात आला.
यशवंतराव चव्हाण स्मृती सदनासाठी साडेतीन कोटी
पालिकेच्या यशवंतराव चव्हाण स्मृती सदनातील सुधारणा कामाचा ठराव सभेत मंजूर करण्यात आला. या कामासाठी सुमारे साडेतीन कोटी रुपयांचा निधी मंजूर झाल्याची माहिती नगराध्यक्ष राजेंद्रसिंह यादव यांनी दिली.
दरम्यान, पालिकेच्या प्रशासकीय कालावधीत झालेल्या घनकचरा प्रकल्प, रस्ते तसेच अन्य विकासकामांची चौकशी करण्यात येणार असल्याचेही सभेत स्पष्ट करण्यात आले.
प्रभागनिहाय सीसीटीव्ही आणि
‘नो फ्लेक्स झोन’
सभेच्या शेवटी शहरातील विविध प्रभागांमध्ये बसविण्यात येणाऱ्या सीसीटीव्ही कॅमेऱ्यांबाबत तसेच शहरातील ‘नो फ्लेक्स झोन’ निश्चित करण्याबाबतही चर्चा झाली. लवकरच प्रभागनिहाय सीसीटीव्ही व्यवस्था आणि शहरातील नो फ्लेक्स झोनची ठिकाणे जाहीर करण्यात येणार असल्याचे पालिका प्रशासनाकडून सांगण्यात आले.
