उदयनराजे भोसले यांचे चुलते छत्रपती शिवाजीराजे भोसले यांचे वृध्दापकाळाने निधन झालं आहे. पुणे येथील जहांगीर हॉस्पिटलमध्ये त्यांच्यावर उपचार सुरु होते. उपचारादरम्यान आज सायंकाळी ५.४५ वाजता प्राणज्योत मालवली. शिवाजीराजे भोसले यांचे पार्थिव रात्री उशिरा अदालत वाडा येथे आणला जाणार आहे त्यांच्या पार्थिवावर उद्या अंत्यसंस्कार होणार आहेत. शिवाजीराजे भोसले यांनी अनेक वेळा खासदार उदयनराजे भोसले आणि आमदार शिवेंद्रराजे भोसले यांच्यात मनोमिलन केले होते.
शिवाजीराजे भोसले यांची कारकीर्द
साताऱ्याच्या राजघराण्यातील पुण्यशील सुमित्राराजे भोसले आणि शाहू महाराज यांना प्रतापसिंह, अभयसिंह, विजयसिंह आणि शिवाजीराजे अशी चार मुलं, शिवाजीराजे भोसले हे सर्वात लहान होते. त्यांचा जन्म 23 एप्रिल 1947 साली झाला होता. शिवाजीराजे भोसले यांनी सातारा शहराचे नगराध्यक्ष म्हणून 15 मे 1985 ते 16 डिसेंबर 1991 पर्यंत काम केलं. याकाळात त्यांनी सातारा शहराच्या विकासासाठी विविध विकासकामं केली.
शिवाजीराजे भोसले यांना खेळाची आवड होती. महाराष्ट्र राज्य बॅडमिंटन असोसिएशनचे ते राज्य उपाध्यक्ष होते. तसेच शिक्षण क्षेत्रात ही त्यांनी काम केलं. सातारा शहरातील आरे गावच्या श्री भैरवनाथ शिक्षण संस्थेचे ते अध्यक्ष म्हणून कार्यरत होते. शिवतेज माध्यमिक विद्यालय, आरे या संस्थेच्या उल्लेखनीय कार्यात त्यांचं मार्गदर्शन नेहमी असायचं.
अदालत वाडा आणि शिवाजीराजे भोसले यांच्याविषयी सातारकरांमध्ये नेहमी आदराची भावना राहिली आहे. शिवाजीराजे भोसले हे गेली ७५ वर्ष साताऱ्यातील आदालत वाडा येथे राहत होते. आदालत वाडा हा न्यायनिवाडा करणारा वाडा म्हणून सुपरिचित होता व आज देखील आहे. आजही या वाड्यातून दिलेला शब्द अथवा आदेश हा सातारकर सन्मानपूर्वक मानतात.
No comments:
Post a Comment