अतुलबाबांच्या एका फोनने कराडचा उड्डाणपूल खुला! वाहतूक कोंडीची तातडीने घेतली दखल; अवघ्या पाच मिनिटांत अधिकाऱ्यांना सूचना, हजारो प्रवाशांना मोठा दिलासा ;

वेध माझा ऑनलाइन।

सणासुदीच्या सुट्ट्या संपवून पुणे-मुंबईच्या दिशेने परतणाऱ्या हजारो प्रवाशांच्या वाहनांची गर्दी आणि त्यातच पुणे-बंगळुरू राष्ट्रीय महामार्गावरील वाहतूक कोंडी, यामुळे कराड परिसरात प्रवाशांची मोठी गैरसोय होत होती. अशा परिस्थितीत कराड येथील नवीन उड्डाणपूल चाचणीसाठी बंद ठेवण्यात आल्याने वाहतुकीचा ताण आणखी वाढला होता. ही बाब निदर्शनास येताच आमदार डॉ. अतुलबाबा भोसले यांनी तातडीने सूत्रे हलवली. संबंधित अधिकाऱ्यांना फोनवरून सूचना देत त्यांनी अवघ्या पाच मिनिटांत उड्डाणपूल वाहतुकीसाठी खुला करून घेतल्याने हजारो वाहनधारकांना मोठा दिलासा मिळाला.

दिवाळीच्या सुट्ट्यांनंतर कामानिमित्त पुणे, मुंबईकडे परतणाऱ्या नागरिकांची महामार्गावर मोठी गर्दी झाली होती. पुणे-बंगळुरू महामार्ग हा महाराष्ट्र आणि कर्नाटकाला जोडणारा महत्त्वाचा दळणवळण मार्ग असल्याने या मार्गावरून दररोज हजारो लहान-मोठी वाहने धावतात. विशेषतः सणासुदीच्या काळात वाहनांची संख्या वाढल्याने कराड परिसरात वाहतूक व्यवस्थेवर मोठा ताण निर्माण होतो.

याच पार्श्वभूमीवर कराड येथील नवीन उड्डाणपूल चाचणीच्या कारणास्तव बंद ठेवण्यात आला होता. आधीच महामार्गावर वाहनांच्या लांबच लांब रांगा लागलेल्या असताना पुलावरील वाहतूक बंद असल्याने प्रवाशांना अधिक वेळ कोंडीत अडकून राहावे लागत होते. लहान मुले, ज्येष्ठ नागरिक आणि लांब पल्ल्याचा प्रवास करणाऱ्या वाहनधारकांची विशेषतः गैरसोय होत होती.

ही परिस्थिती समजताच आमदार डॉ. अतुलबाबा भोसले यांनी विलंब न करता संबंधित अधिकाऱ्यांशी संपर्क साधला. वाहतुकीची तातडीची गरज लक्षात घेऊन आवश्यक कार्यवाही करण्याच्या सूचना दिल्या. त्यांच्या सूचनेनंतर अवघ्या पाच मिनिटांत उड्डाणपूल वाहतुकीसाठी खुला करण्यात आला. त्यामुळे महामार्गावरील वाहतुकीला पर्यायी मार्ग उपलब्ध होऊन प्रवाशांना दिलासा मिळाला.

लोकप्रतिनिधी म्हणून ऐनवेळी निर्माण होणाऱ्या नागरिकांच्या समस्यांमध्येही तत्परतेने हस्तक्षेप करणे महत्त्वाचे असते. अतुलबाबांनी केलेल्या या तातडीच्या हस्तक्षेपामुळे विकासकामांसोबतच नागरिकांच्या दैनंदिन अडचणी सोडविण्यासाठीही तत्परता दाखविण्याची गरज असते, याचे हे उदाहरण ठरल्याच्या भावना सुज्ञ नागरिकांकडून व्यक्त होत आहेत.

ब्राह्मण समाज सभागृहासाठी ६० लाखांचा निधी मंजूर! पेठ सोमवार येथील सि.स. नं. ७० मध्ये सभागृहासह पार्किंगची सुविधा उभारणार ; जयंत बेडेकर व संचालकांनी अतुलबाबांकड केली होतीे पत्राद्वारे मागणी ;

वेध माझा ऑनलाईन।

कराड शहरातील ब्राह्मण समाजाच्या सामाजिक व सांस्कृतिक उपक्रमांना हक्काचे व्यासपीठ मिळावे, या उद्देशाने पेठ सोमवार येथील सिटी सर्व्हे क्रमांक ७० येथे ब्राह्मण समाज सभागृह व पार्किंग सुविधा उभारण्यासाठी राज्य शासनाच्या विशेष वैशिष्ट्यपूर्ण योजनेतून तब्बल ६० लाख रुपयांचा निधी मंजूर करण्यात आला आहे. या निधीसाठी आमदार डॉ. अतुलबाबा भोसले यांनी विशेष प्रयत्न केल्याबद्दल कराड ब्राह्मण समाज सामाजिक संस्थेच्या वतीने त्यांचे हार्दिक आभार व्यक्त करण्यात आले आहेत.

कराड शहर व तालुक्यातील ब्राह्मण समाजाच्या विविध सामाजिक, शैक्षणिक, सांस्कृतिक आणि धार्मिक उपक्रमांसाठी स्वतंत्र सभागृहाची आवश्यकता अनेक दिवसांपासून जाणवत होती. समाजातील विविध कार्यक्रम, बैठका, सामूहिक उपक्रम तसेच सामाजिक बांधिलकीचे उपक्रम राबविण्यासाठी सभागृह महत्त्वपूर्ण ठरणार आहे. त्याचबरोबर पार्किंगची सुविधाही उपलब्ध होणार असल्याने नागरिकांची मोठी सोय होणार आहे.

या मागणीसाठी कराड ब्राह्मण समाज सामाजिक संस्थेच्या पदाधिकाऱ्यांनी आमदार अतुलबाबा भोसले यांच्याकडे निधी उपलब्ध करून देण्याची मागणी केली होती. या मागणीची सकारात्मक दखल घेत त्यांनी शासनस्तरावर पाठपुरावा केला. त्यातून ६० लाख रुपयांचा निधी मंजूर झाल्याने समाजाच्या अनेक वर्षांच्या अपेक्षेला मूर्त स्वरूप मिळण्याचा मार्ग मोकळा झाला आहे.

या कामासाठी सहकार्य केल्याबद्दल संस्थेचे अध्यक्ष जयंत दत्तात्रय बेडेकर, उपाध्यक्ष विकास विलास देशपांडे, सचिव ओंकार रामचंद्र आपटे (गुरुजी), प्रशांत शशिकांत कुलकर्णी, खजिनदार तसेच सर्व संचालक मंडळ आणि समाज बांधवांनी आमदार अतुलबाबा भोसले यांचे आभार मानले आहेत.

समाजाच्या सामाजिक आणि सांस्कृतिक चळवळीला बळ देणारे हे सभागृह भविष्यात कराडमधील ब्राह्मण समाजासाठी महत्त्वाचे केंद्र ठरणार आहे.

राहुल गांधी यांच्या निवासस्थानी दिवाळीनिमित्त स्नेहमिलन सोहळा; माजी मुख्यमंत्री पृथ्वीराज चव्हाण यांची उपस्थिती :

वेध माझा ऑनलाइन।

लोकसभेतील विरोधी पक्षनेते राहुल गांधी यांनी शुक्रवार, दि. ६ नोव्हेंबर रोजी नवी दिल्लीतील ५, सुनहरी बाग रोड येथील आपल्या निवासस्थानी काँग्रेसच्या वरिष्ठ नेत्यांसाठी 'दिवाळी मंगल मिलन' आणि स्नेहभोजन समारंभाचे आयोजन केले होते. या कार्यक्रमाला महाराष्ट्राचे माजी मुख्यमंत्री तथा माजी केंद्रीय मंत्री पृथ्वीराज चव्हाण यांच्यासह देशभरातील काँग्रेसचे अनेक ज्येष्ठ नेते, विद्यमान व माजी मुख्यमंत्री आणि विविध राज्यांतील पक्षाचे प्रमुख पदाधिकारी उपस्थित होते.

या दिवाळी स्नेहमिलन सोहळ्याला लोकसभेतील विरोधी पक्षनेते खा. राहुल गांधी यांच्यासह काँग्रेसच्या ज्येष्ठ नेत्या सोनिया गांधी, काँग्रेसच्या खासदार प्रियांका गांधी, कर्नाटकचे माजी मुख्यमंत्री सिद्धरामय्या, महाराष्ट्राचे माजी मुख्यमंत्री पृथ्वीराज चव्हाण, छत्तीसगडचे माजी मुख्यमंत्री भूपेश बघेल, मध्य प्रदेशचे माजी मुख्यमंत्री दिग्विजय सिंह, हरियाणाचे माजी मुख्यमंत्री भूपेंद्र सिंह हुड्डा आणि राजस्थानचे माजी मुख्यमंत्री अशोक गेहलोत यांच्यासह अनेक वरिष्ठ नेत्यांनी उपस्थिती लावली. तसेच काँग्रेसशासित राज्यांचे मुख्यमंत्री, विविध राज्यांचे प्रदेशाध्यक्ष, प्रदेश काँग्रेस कमिटीचे प्रमुख आणि देशभरातील १०० हून अधिक वरिष्ठ काँग्रेस नेते या कार्यक्रमात सहभागी झाले होते.

या कार्यक्रमादरम्यान राहुल गांधी यांनी उपस्थित नेत्यांच्या प्रत्येक टेबलवर जाऊन त्यांची वैयक्तिक भेट घेतली. सर्वांशी आपुलकीने संवाद साधत त्यांनी दिवाळीच्या शुभेच्छा दिल्या. देशाच्या विविध राज्यांतील काँग्रेस नेत्यांना एकत्र येऊन परस्परांशी संवाद साधण्याची संधी या स्नेहमिलनाच्या निमित्ताने मिळाली.

या स्नेहमिलन कार्यक्रमानंतर प्रसारमाध्यमांशी संवाद साधताना माजी मुख्यमंत्री पृथ्वीराज चव्हाण यांनी सांगितले की, "या भेटीमागे कोणताही राजकीय हेतू नाही. दिवाळी सणाच्या निमित्ताने देशभरातील काँग्रेसच्या वरिष्ठ नेत्यांना एकत्र भेटण्याची आणि त्यांच्याशी संवाद साधण्याची ही एक चांगली संधी होती. हा पूर्णपणे कौटुंबिक आणि अनौपचारिक स्वरूपाचा स्नेहमेळावा होता."

विशेष म्हणजे, या कार्यक्रमाचे स्वरूप पूर्णपणे अनौपचारिक आणि कौटुंबिक होते. या स्नेहभोजनादरम्यान कोणतीही अधिकृत राजकीय बैठक किंवा आगामी राजकीय रणनीतीबाबत चर्चा झाली नसल्याचे सांगण्यात आले. दिवाळीच्या निमित्ताने आयोजित करण्यात आलेल्या या स्नेहमिलन सोहळ्यात देशभरातील काँग्रेसच्या वरिष्ठ नेत्यांनी एकत्र येत सणाचा आनंद साजरा केला.

कराड शहराच्या विकासासाठी २.१० कोटींचा निधी ; मलकापूरसाठी २.९० कोटींचा निधी ;

वेध माझा ऑनलाइन

 कराड दक्षिण विधानसभा मतदारसंघाचे आमदार डॉ. अतुलबाबा भोसले यांच्या विशेष प्रयत्नांमुळे कराड आणि मलकापूर शहराच्या विकासासाठी भाजपा-महायुती सरकारने तब्बल ५ कोटींचा निधी मंजूर केला आहे. या निधीतून कराडमध्ये २.१० कोटींची आणि मलकापूर शहरात २.९० कोटींची विविध पायाभूत स्वरुपाची विकासकामे केली जाणार आहेत. यामुळे या शहरांच्या विकासाला चालना मिळण्यास मदत होणार आहे. 

कराड व मलकापूर शहराच्या सर्वांगीण विकासासाठी आमदार डॉ. अतुलबाबा भोसले सातत्याने विशेष प्रयत्नशील राहिले आहेत. भाजपा – महायुती सरकारच्या माध्यमातून त्यांनी शहराच्या प्रगतीसाठी अनेक नाविण्यपूर्ण उपक्रम राबविण्यासाठी यापूर्वीदेखील भरघोस निधी उपलब्ध करुन दिला आहे. यात आता आणखी ५ कोटींच्या निधीची भर पडली आहे. आ. डॉ. भोसले यांनी केलेल्या सातत्यपूर्ण पाठपुराव्यामुळे ‘नगरपरिषदांना वैशिष्ट्यपूर्ण कामासाठी विशेष अनुदान’ या योजनेअंतर्गत नगर विकास विभागाच्यावतीने कराडसाठी २.१० कोटींचा; तर मलकापूरसाठी २.९० कोटींचा निधी मंजूर करण्यात आला आहे. 

या निधीच्या माध्यमातून कराडमधील सोमवार पेठ (सिटी सर्व्हे क्रमांक ७०) येथील नगरपरिषदेच्या मालकीच्या जागेत सभागृह बांधण्यासाठी ६० लाख रुपये, भोई समाज सभागृहाच्या नूतनीकरणासाठी २० लाख, छत्रपती संभाजी महाराज भाजी मंडईच्या नूतनीकरणासाठी १० लाख, बुधवार पेठ येथील आरक्षण क्रमांक ३४ मधील खेळाचे मैदान विकसित करण्यासाठी ७० लाख आणि यशवंतराव चव्हाण सभागृहातील वाचनालयामध्ये अभ्यासिका विकसित करण्यासाठी ५० लाख रुपये निधी मंजूर करण्यात आला आहे. 

तसेच मलकापूरमधील लाहोटीनगर येथे स्मार्ट अंगणवाडी इमारत बांधण्यासाठी २० लाख, २४ बाय ७ नळपाणीपुरवठा योजनेअंतर्गत जलशुद्धीकरण केंद्रातील पाणीपुरवठाविषयक कामांसाठी ५० लाख, प्रभाग क्रमांक ६ मधील सर्व्हे क्रमांक २०८ पैकी खुल्या जागेत उद्यान विकसित करण्यासाठी ९० लाख, आगाशिवनगर येथील स्मशानभूमी विकसित करण्यासाठी ४० लाख, तर त्याच परिसरातील ख्रिश्चन समाजाच्या दफनभूमीच्या विकासासाठी ४५ लाख, पुण्यश्लोक राजमाता अहिल्यादेवी होळकर शेतकरी भाजी मंडईच्या नूतनीकरणासाठी २५ लाख आणि मलकापूर नगरपरिषद हद्दीतील १५ ठिकाणी स्ट्रीटलाईट बसविण्यासाठी २० लाख रुपये निधी मंजूर झाला आहे.

या अंतर्गत मंजूर विकासकामांचा १०० टक्के खर्च राज्य शासनाकडून करण्यात येणार आहे. त्यामुळे या विकासनिधीच्या मंजुरीमुळे कराड व मलकापूर शहरातील पायाभूत सुविधांच्या विकासाला चालना मिळण्यास मदत होणार आहे. कराड व मलकापूर शहरासाठी ५ कोटींचा निधी मंजूर केल्याबद्दल शहवासीयांकडून मुख्यमंत्री ना. देवेंद्र फडणवीस, उपमुख्यमंत्री तथा नगरविकास मंत्री ना. एकनाथ शिंदे, उपमुख्यमंत्री ना. सुनेत्राताई पवार आणि आमदार डॉ. अतुलबाबा भोसले यांच्यासह भाजपा-महायुती सरकारचे आभार मानले जात आहेत.

निवडणुकीपूर्वी दिलेला शब्द केवळ राजकीय औपचारिकता न ठेवता तो प्रत्यक्षात उतरविण्याची भूमिका अतुलबाबांनी घेतली. त्यामुळे उंडाळकर यांच्या विजयामागे राजकीय पाठबळाबरोबरच परस्पर विश्वासाचे नातेही अधोरेखित झाले आहे.

विशेष म्हणजे, जिल्हा बँकेच्या निवडणुकीत स्वतःची राजकीय भूमिका आणि स्थान कायम ठेवतानाच सहकारातील सहकाऱ्याला दिलेला शब्द पाळण्याची भूमिका अतुलबाबांनी घेतली. यामुळे त्यांच्या राजकीय व्यवहारातील विश्वासार्हतेची चर्चा सुरू झाली आहे.

राजकारणात डावपेच महत्त्वाचे असतात पण दिलेला शब्द पाळण्याची वृत्ती नेतृत्वाची खरी ओळख ठरते. उदयसिंहदादा पाटील उंडाळकर यांच्या विजयाच्या निमित्ताने अतुलबाबा भोसले यांनी हीच भूमिका अधोरेखित केली असून, जिल्ह्याच्या सहकार आणि राजकीय वर्तुळात या घडामोडीला विशेष महत्त्व प्राप्त झाले आहे.

तुम्ही बाहेरगावी सहलीला पाठवलेल मतदार 105 जण होते...तरीही तुम्हाला 101 मते पडली...म्हणजेच 4 कमी पडली म्हणजेच फुटली ; उदयदादा म्हणाले : हो 3 मते फुटली...एक बाद झाले... ती कोण आहेत, यावर नंतर बोलेन...

वेध माझा ऑनलाइन।

निवडणुकीपूर्वी तुमच्या 105 मतदारांना तुम्ही लांब सहलीला पाठवलं... मतदानादिवशी हे 105 मतदार मतदानस्थळी थेट सहलीहुन आले आणि त्यांनी मतदान केले...ते 105 जण होते...तरी तुम्हाला 101 मते पडली...किमान सहलीला गेलेले 105 तरी पडायला पाहिजे होती...मात्र तसे झाले नाही...101 मते पडली...म्हणजे 4 मते कमी पडली म्हणजे फुटली ? असे पत्रकारांनी विचारले असता...हो...अशी कबुली देत 4 नाही 3 फुटली...एक मत बाद झालं...अस सांगत ऍड उदय पाटील यांनी ती कोण आहेत हे नंतर सांगेन असे ते पत्रकारांशी बोलताना म्हणाले...

सातारा जिल्हा मध्यवर्ती सहकारी बँकेच्या निवडणुकीत कराड तालुक्यातील सोसायटी प्रतिनिधी गटातून ऍड उदयसिंह पाटील उंडाळकर यांनी आज विजयाचा गुलाल उधळला. मतदान प्रक्रिया एक नोव्हेंबर रोजी पार पडली, तर आज तीन नोव्हेंबर रोजी साताऱ्यात मतमोजणी झाली. या मतमोजणीत विजय मिळवल्यानंतर उदयसिंह उंडाळकर यांनी यशवंतराव चव्हाण यांच्या समाधीस्थळी भेट देत दर्शन घेतलं.

त्यानंतर शेती उत्पन्न बाजार समितीत पत्रकार परिषद आयोजित करण्यात आली होती त्यावेळी ते बोलत होते

ते पुढे म्हणाले

कराड तालुक्यातील सोसायटी मतदारसंघातून मला जिल्हा बँकेत प्रतिनिधी म्हणून काम करण्याची संधी ठरावधारकांनी दिली असून, त्यांचा हा विश्वास सार्थ ठरवण्याचा प्रयत्न करणार असल्याचं त्यांनी सांगितलं.

दरम्यान,  काकांनी तब्बल ५५ वर्षे कराड तालुक्याचं सोसायटी मतदारसंघातून जिल्हा मध्यवर्ती बँकेत प्रतिनिधित्व केलं. या काळात बँकेत आर्थिक शिस्त निर्माण करण्याचा प्रयत्न करण्यात आला. याच शिस्तीमुळे जिल्हा बँकेला राज्यातच नव्हे, तर देशातही अग्रस्थान मिळवता आलं, अशी भावना उदयसिंह उंडाळकर यांनी व्यक्त केली.

मागील पाच वर्षांत संघटनेमध्ये काहीशी वेगळी भावना निर्माण झाली होती. मागील निवडणुकीत निसटत्या मतांनी पराभव स्वीकारावा लागला होता. मात्र, यावेळी संघटनेतील कार्यकर्त्यांनी जिद्द आणि चिकाटीच्या जोरावर विजय खेचून आणला. कोणतंही संतुलन न गमावता कार्यकर्त्यांनी केलेल्या प्रयत्नांचं त्यांनी विशेष कौतुक केलं.

हा विजय केवळ निवडणुकीतील विजय नसून, तत्त्वांचा आणि विचारांचा विजय असल्याचं उदयसिंह उंडाळकर यांनी म्हटलंय. काकांनी ज्या विचारांवर सहकार क्षेत्रात काम केलं, त्याच विचारांवर संघटना उभी राहिली आहे. तसेच डॉ सूरेशबाबा, अतुलबाबा आणि मनोजदादा यांनी या निवडणूक प्रक्रियेत दिलेल्या पाठिंब्याबद्दलही त्यांनी आभार व्यक्त केले.

 

पालकमंत्री शंभूराज देसाई पहिल्यांदाच जिल्हा बँकेचे संचालक झाले ; तब्बल 45 वर्षांनी झाली देसाई कुटुंबियांची बँकेत एन्ट्री ;

वेध माझा ऑनलाइन

सातारा जिल्हा मध्यवर्ती सहकारी बँकेच्या निवडणुकीचा निकाल जाहीर झाला आहे. महायुतीने बॅंकेवर आपला झेंडा रोवला असून महाविकास आघाडीला भोपळाही फोडता आला नाही. शंभूराज देसाई यांच्या रूपाने लोकनेते बाळासाहेब देसाई यांच्या कुटुंबातील सदस्याची ४५ वर्षांनी बॅंकेत एन्ट्री झाली आहे. त्यांचे साडू ॲड. उदयसिंह पाटील-उंडाळकर हे देखील विजयी झाले आहेत. तिरंगी लढतीत माणमधून मंत्री जयकुमार गोरे यांनी बाजी मारली.

पाटण आणि कराड तालुका सोसायटी मतदार संघात शंभूराज देसाई आणि ॲड. उदयसिंह पाटील-उंडाळकर यांचा मागील निवडणुकीत पराभव झाला होता. परंतु, या निवडणुकीत दोघांनीही पराभवाचे उट्टे काढत बॅंकेत दिमाखात एन्ट्री केली आहे. पालकमंत्री शंभूराज देसाई पहिल्यांदाच जिल्हा बँकेचे संचालक झाले आहेत. त्यांनी आपले पारंपरिक विरोधक सत्यजितसिंह पाटणकर यांचा पराभव केला. देसाईंना 58 आणि पाटणकरांना 46 मते मिळाली. उदयसिंह पाटील यांनी 100 मते मिळवत धनंजय पाटील (44) यांच्यावर मोठ्या फरकाने मात केली. देसाई आणि उंडाळकर हे एकमेकांचे साडू आहेत.