उदयनराजे आणि देवेंद्र फडणवीस यांची मुंबईमध्ये भेट ? ; साताऱ्याची उमेदवारी कोणाच्या गळ्यात पडणार ? काय आहे बातमी...

वेध माझा ऑनलाईन। राज्यामध्ये भाजपची लोकसभा उमेदवारांची पहिली यादी जाहीर झाल्यापासूनच माढा लोकसभेला अक्षरशः रणसंग्राम सुरू आहे. या ठिकाणी महायुती धर्म संकटात आली असतानाच आता साताऱ्यामध्ये सुद्धा खासदार उदयनराजे भोसले यांना पहिल्या यादीमध्ये उमेदवारी न मिळाल्याने कार्यकर्त्यांमध्ये संतापाची लाट पसरली आहे. दरम्यान याच पार्श्वभूमीवर उदयनराजे आणि देवेंद्र फडणवीस यांची मुंबईमध्ये नुकतीच भेट झाल्याचे खात्रीलायक वृत्त आहे

साताऱ्याची उमेदवारी कोणाच्या गळ्यात पडणार?

या सर्व पार्श्वभूमीवर उदयनराजे भोसले यांनी सुद्धा मी अजूनही संन्यास घेतलेले नाही असे म्हणत उमेदवारीसाठी स्पष्ट इच्छा व्यक्त केली आहे. त्यामुळे महायुतीमध्ये साताऱ्याची उमेदवारी कोणाच्या गळ्यात पडणार? याकडे लक्ष आहे. माढामध्ये महायुतीकडून रणजितसिंह निंबाळकर यांना उमेदवारी जाहीर झाल्यानंतर मोहिते पाटील गट कमालीचा आक्रमक झाला असून त्या ठिकाणी मोहिते पाटील गट आणि रामराजे निंबाळकर सुद्धा एकत्र आल्याने माढामध्ये नेमकं चाललंय तरी काय असा प्रश्न उपस्थित झाला आहे. 

उदयनराजे आणि देवेंद्र फडणवीस यांची मुंबईमध्ये भेट

हा एका बाजूने संघर्ष सुरू असताना उदयनराजे भोसले यांनी देवेंद्र फडणवीस यांची काल (19 मार्च) भेट घेतल्याची माहिती विश्वासनीय सूत्रांनी दिली आहे. काल रात्री उदयनराजे आणि  देवेंद्र फडणवीस यांची मुंबईमध्ये भेट झाली. तब्बल दोन तास झालेल्या बैठकीचा तपशील समोर आला नसला, तरी उदयनराजे हे नाराज असल्याची चर्चा आहे. त्यामुळे समर्थकांमध्ये प्रचंड नाराजी आहे. दोन दिवसांपूर्वीच भाजपचे संकटमोचक मानले जाणारे गिरीश महाजन यांनी सुद्धा उदयनराजे यांची त्यांच्या निवासस्थानी भेट घेत त्यांची नाराजी दूर करण्याचा प्रयत्न केल्याची चर्चा रंगली होती. मात्र, उदयनराजे यांनी थेट मुंबईमध्ये येऊन फडणसांची भेट घेतल्याने उमेदवारी कोणाच्या पारड्यात पडणार याची उत्सुकता आहे. 

दरम्यान याठिकाणी अजित पवार गटाने सुद्धा सातारा लोकसभेला दवा केला आहे. शिवसेना शिंदे गटाकडूनही सातारा जिल्हाप्रमुख पुरुषोत्तम जाधव यांनी सुद्धा उमेदवारीसाठी दावा केला आहे. त्यांनी आपला नैसर्गिक हक्क असल्याचे म्हटले आहे. भाजपकडून उमेदवारीवरून उदयनराजे प्रयत्नशील असतानाच भाजपकडूनच माथाडी नेते नरेंद्र पाटील यांनी सुद्धा उमेदवारीवर दावा केला आहे. त्यामुळे उमेदवारीच्या या स्पर्धेत नेमक्या कोणाच्या वाट्याला उमेदवारी येणार? याकडे लक्ष आहे.