शनिवारी पाटण येथे महाविकास आघाडीचा संवाद मेळावा ; विद्यमान खासदार श्रीनिवास पाटील यांच्या नावाचा साधा उल्लेखही नाही, त्यांचा फोटोही नाही ; खासदार "पाटलांना' डावलून होणार हा मेळावा?

वेध माझा ऑनलाइन ; सातारा लोकसभा निवडणुकीच्या पार्श्वभूमीवर महाविकास आघाडीतील मित्र पक्षांचा 'संवाद मेळावा' शनिवार दिनांक ३० मार्च रोजी ऋचा हॉल, काळोली (कराड-चिपळूण रोड) येथे दुपारी १२:३० वा. होणार आहे. 

दरम्यान खासदार श्रीनिवास पाटील तसेच त्यांचे चिरंजीव सारंग पाटील यांचे साधे नावदेखील या मेळाव्याच्या जाहीर केलेल्या उपस्थितांच्या लिस्टमध्ये दिसत नाही... तसेच या मेळाव्याची प्रसिद्धी करणाऱ्या फ्लेक्सवरही या दोघांचा फोटोही लावण्यात आलेला नसल्याने श्रीनिवास पाटील व सारंग पाटील या दोघांनाही सरळ सरळ या मेळाव्यापासून डावलल्याचे स्पष्टपणे दिसून येत आहे... ज्यांनी लोकसभा निवडणुकीसाठी आपली इच्छा व्यक्त केली, त्या खासदार श्रीनिवास पाटील यांनाच डावलून हा मेळावा होऊ घातल्याने संपूर्ण राज्यात याविषयी चर्चा सुरू आहे

दरम्यान आतापर्यंत श्रीनिवास पाटील यांना राष्ट्रवादी पक्षाकडून सतत खासदारकी मिळाली मात्र त्यांनी पक्ष वाढीसाठी काय काम केले ? जिल्ह्यातील महिलांचे प्रश्न असतील तसेच शेतकरीवर्ग, बेरोजगारांसाठी ठोस असे काय केले ? जिल्ह्यातील वाढत्या गुन्हेगारीला आळा घालण्यासाठी कोणते उपाय केले? किती उद्योग जिल्ह्यात आणले? किती संस्था उभ्या केल्या? शिक्षण, आरोग्य अशा अनेक विषयामधील समस्या सोडवण्यासाठी खासदार श्रीनिवास पाटील  यांनी नेमके किती उठावदार काम केले ?असे अनेक प्रश्न या मेळाव्याच्या निमित्ताने पाटण परिसरात श्रीनिवास पाटील याना विचारण्यात येत आहेत...

यापूर्वी कराड तालुक्यात झालेल्या राष्ट्रवादीच्या मेळाव्याला देखील श्रीनिवास पाटील यांचा फोटो व नाव नव्हतं... त्यांना त्यावेळी देखील डावलल्याचे पाहायला मिळाले होते... आताही पाटणकर गटाकडून घेण्यात आलेल्या महाविकास आघाडीच्या होणाऱ्या या मेळाव्याला विद्यमान खासदारांना पुन्हा डावलल्याने त्यांच्या उमेदवारीला सातारा जिल्ह्यात प्रचंड मोठा विरोध आहे हेच स्पष्ट झाले आहे...दरम्यान संपूर्ण राज्यात हा चर्चेचा विषय झाला आहे 

दरम्यान या संवाद मेळाव्यासाठी माजी मुख्यमंत्री व राष्ट्रीय कॉंग्रेसचे प्रमुख नेते पृथ्वीराज चव्हाण, राष्ट्रवादी काँग्रेस शरदचंद्र पवार पक्षाचे चे माजी मंत्री बाळासाहेब पाटील,माजी मंत्री शशिकांत शिंदे,  माजी मंत्री विक्रमसिंह पाटणकर, श्रमिक मुक्ती दलाचे अध्यक्ष डॉ. भारत पाटणकर,   शिवसेना उ.बा.ठाकरे पक्षाचे प्रवक्ते नितीन बानगुडे-पाटील,    शेतकरी संघटनेचे अध्यक्ष शंकरराव गोडसे ,  राष्ट्रीय कॉंग्रेसचे राष्ट्रीय सरचिटणीस हिंदुराव पाटील, राष्ट्रवादी शरदचंद्र पवार गटाचे जिल्हाध्यक्ष सुनील माने, शिवसेना उ.बा.ठाकरे सातारा जिल्हा अध्यक्ष हर्षद कदम या मान्यवरांची प्रमुख उपस्थिती असणार आहे. अशी माहिती राष्ट्रवादी काँग्रेस-शरदचंद्र पवार पक्षाचे पाटण विधानसभा मतदारसंघाचे नेते व सातारा जिल्हा मध्यवर्ती सहकारी बँकेचे संचालक सत्यजितसिंह पाटणकर व पाटण तालुका अध्यक्ष राजाभाऊ शेलार यांनी प्रसिद्धी पत्रकाद्वारे दिली आहे.

आगामी सातारा लोकसभा निवडणुकीच्या दृष्टीने हा संवाद मेळावा अत्यंत महत्त्वाचा आहे. पाटण विधानसभा मतदारसंघातील महाविकास आघाडीच्या मित्रपक्षांच्या पदाधिकारी व कार्यकर्त्यांना या मेळाव्यातून उपस्थित मान्यवर मार्गदर्शन करणार आहेत. पाटण तालुका हा मतदानाच्या दृष्टीने फार मोठा मतदारसंघ असल्याने महाविकास आघाडीतील मित्र पक्षांमध्ये चांगला समन्वय साधून जास्तीत जास्त मतदान महाविकास आघाडीच्या उमेदवाराच्या पारड्यात पाडण्यासाठी यावेळी रणनीती तयार करण्यात येणार असल्याचेही पत्रकात म्हटले आहे.  त्यामुळे महाविकास आघाडीतील सर्व घटक पक्षांचे प्रमुख नेते, सर्व पदाधिकारी, सर्व संस्थाचे चेअरमन, व्हॉ.चेअरमन, संचालक, आजी माजी जि.प.सदस्य, आजी माजी पं.स.सदस्य, आजी माजी नगराध्यक्ष , उपनगराध्यक्ष, नगरसेवक नगरसेविका, आजी माजी सरपंच, उपसरपंच , ग्रामपंचायत सदस्य व सर्व मित्रपक्षांच्या कार्यकर्त्यांनी या संवाद मेळाव्यासाठी उपस्थित रहावे असे आवाहन या पत्रकातून करण्यात आले आहे.