Tuesday, July 21, 2026

भाजपचा बडा नेता राहुल गांधी यांच्यासोबत चर्चेसाठी दाखल, काय आहे बातमी?

वेध माझा ऑनलाईन।
सीजेपीच्या आंदोलनामुळे राजधानी दिल्लीतील वातावरण चांगलेच ढवळून निघाले आहे. सीजेपीच्या 20 जुलै रोजीच्या संसद मार्चनंतर हे आंदोलन संपून जाईल, असे म्हटले जात होते. परंतु आता जोपर्यंत केंद्रीय शिक्षणमंत्री धर्मेंद्र प्रधान यांचा राजीनामा होत नाही, तोपर्यंत आमचे आंदोलन चालूच राहील, अशी भूमिका सीजेपीचे संस्थापक अभिजित दीपके यांनी स्पष्ट केली. त्यानंतर आज पुन्हा एकदा सीजेपीचे आंदोलन जंतर-मंतरवर सुरूच आहे. दरम्यान, या आंदोलनात आता विरोधी पक्षदेखील सहभागी होत आहेत. एकीकडे लोकसभेचे विरोधी पक्षनेते राहुल गांधी, प्रियंका गांधी हे देखील सामिल झाले आहेत. गांधी हे पंतप्रधांनाच्या निवासस्थान परिसरात ठिय्या आंदोलन करत असून आता याबाबत मोठी अपडेट समोर आली आहे.
केंद्रीय मंत्री जितेंद्र सिंह हे राहुल गांधी यांच्यासोबत चर्चेसाठी पोहोचले आहेत. या चर्चेत नेमकं काय घडणार या कडे देशाचे लक्ष लागून आहे.

विद्यार्थ्यांवरील लाठीचार्जच्या निषेधार्थ प्रकाश आंबेडकरांची मुंबई बंदची हाक ;

वेध माझा ऑनलाईन।
दिल्लीतील जंतर-मंतर येथे CJP आंदोलनादरम्यान झालेल्या पोलिस लाठीमाराच्या निषेधार्थ वंचित बहुजन आघाडीचे अध्यक्ष प्रकाश आंबेडकर यांनी 23 जुलै रोजी मुंबई बंदची हाक दिली आहे. आंदोलनादरम्यान विद्यार्थ्यांवर झालेल्या कथित पोलिस कारवाईचा निषेध म्हणून हा बंद पुकारण्यात आल्याचे त्यांनी सांगितले.

माध्यमांशी संवाद साधताना प्रकाश आंबेडकर यांनी या मुंबई बंदमध्ये सर्व विरोधी पक्षांनी सहभागी व्हावे, असे आवाहन केले. तसेच नागरिकांनी शांततेच्या मार्गाने बंद पाळावा आणि कोणताही अनुचित प्रकार घडू नये, याची काळजी घ्यावी, असेही त्यांनी स्पष्ट केले.

प्रकाश आंबेडकर यांनी पुढे आवाहन करत सांगितले की, नागरिकांनी स्वेच्छेने सेवा आणि कामकाजातून दूर राहावे. व्यापाऱ्यांनी दुकाने बंद ठेवावीत, तर टॅक्सी, ओला आणि उबेर सेवा देखील त्या दिवशी बंद ठेवाव्यात, असे त्यांनी म्हटले. तसेच बेस्टच्या बसेस डेपोतून बाहेर काढू नयेत, अशी मागणीही त्यांनी केली.

सदाभाऊ खोत यांचे वादग्रस्त वक्तव्य ; कॉकरोच जनता पार्टीच्या आंदोलकांना दिली दहशतवाद्यांची उपमा ;

वेध माझा ऑनलाईन।
शेतकरी नेते सदाभाऊ खोत यांनी दिल्लीत सुरु असलेल्या आंदोलनावर वादग्रस्त प्रतिक्रिया दिली आहे. त्यांनी कॉकरोच जनता पार्टीच्या आंदोलकांना दहशतवाद्यांची उपमा दिली आहे. त्यावर आता या आंदोलनात सहभागी झालेल्या मराठी मुलांनी प्रतिक्रिया दिली आहे. “सरकार आता कोणाला आतंकवादी बोलायचं शिल्लक राहिलेलं नाही. जे सरकार विरोधात बोलतात त्यांना सरकार दहशतवादी म्हणतं. काल ही तरुण मुलं ही ग्रामीण भागातील मुलं होती. देशभरातून आलेली मुलं होती. शिक्षणासाठी लढणारी मुलं होती. त्यांना तुम्ही आतंकवादी म्हणत असाल तर तुम्ही फक्त देशभक्त. तुमचा भाजप फक्त देशभक्त दिसतो. बाकी सगळे लोक दहशतवादी वाटतात” अशा शब्दात या मुलांनी संताप व्यक्त केला. सदाभाऊ खोत यांना सर्टिफिकेट द्यायची गरज नाही. देशद्रोही म्हणणं म्हणजे त्या आमदाराची लायकी नाही. त्यांना रस्त्यात पकडून जाब विचारला पाहिजे. मत घेताना लाज वाटली नाही का? असा सवाल या मुलाने विचारला.

राहुल गांधी, प्रियांका गांधी यांचे पंतप्रधान नरेंद्र मोदींच्या निवासस्थानाबाहेर धरणे आंदोलन ;

वेध माझा ऑनलाईन।
दिल्लीतील जंतर-मंतर परिसरात नीट पेपरफुटी प्रकरणावरून झालेल्या आंदोलनादरम्यान मोठा तणाव निर्माण झाला. संसद मार्च रोखताना आंदोलक आणि पोलिसांमध्ये धक्काबुक्की झाली. त्यानंतर काही आंदोलक संसद परिसराच्या प्रवेशद्वाराजवळ पोहोचले. परिस्थिती नियंत्रणात आणण्यासाठी पोलिसांनी लाठीचार्ज केल्याचा आरोप करण्यात आला. या लाठीचार्जच्या निषेधार्थ विरोधकांनी आता सत्ताधाऱ्यांना घेरलं आहे.

दरम्यान, राहुल गांधी, प्रियांका गांधी आणि काँग्रेसच्या इतर खासदारांनी पंतप्रधान नरेंद्र मोदी यांच्या 7, लोक कल्याण मार्ग येथील निवासस्थानाबाहेर धरणे आंदोलन केले. कॉक्रोज जनता पार्टी च्या आंदोलनादरम्यान झालेल्या कथित लाठीचार्जचा निषेध करत त्यांनी केंद्रीय शिक्षणमंत्री धर्मेंद्र प्रधान यांच्या राजीनाम्याची मागणी केली. या संपूर्ण प्रकरणामुळे नीट पेपरफुटीचा मुद्दा पुन्हा राष्ट्रीय स्तरावर चर्चेत आला आहे. प्रियांका गांधी तसेच इतर नेत्या मांडी घालूनच बसल्या आहेत.

आमची मुलं काय दहशतवादी आहेत का? अभिजीत दिपकेंच्या आईचा सवाल ; आणखी काय म्हणाल्या?

वेध माझा ऑनलाईन।
सोमवारी दिल्लीमध्ये आंदोलकांवर पोलिसांकडून लाठीचार्ज करण्यात आला, दरम्यान त्यानंतर आता या आंदोलनावर अभिजीत दिपके यांच्या आईची पहिली प्रतिक्रिया समोर आली आहे.
गेल्या अनेक दिवसांपासून कॉकोरच जनता पार्टीच्या वतीने शिक्षण मंत्री धर्मेंद्र प्रधान यांच्या राजीनाम्याची मागणी होत आहे. सोमवारी कॉकरोच जनता पार्टीच्या वतीने थेट संसद भवनावर मोर्चा काढण्यात आला होता. या मोर्चात मोठ्या संख्येनं आंदोलक सहभागी झाले होते. या आंदोलकांवर पोलिसांकडून लाठीचार्ज करण्यात आला. मात्र अजूनही दिल्ली येथील जंतर मंतरवर आंदोलन सुरूच आहे. यावर आता अभिजीत दिपके यांच्या आई अनिता दिपके यांची पहिली प्रतिक्रिया समोर आली आहे.

‘लाठीचार्ज व्हायला नव्हता पाहिजे, लेकर तिथे आंदोलन करण्यासाठी गेले होते. आज एक महिना झाला तिथे त्यांचं आंदोलन सुरू आहे. तिथे कोणतीही घटना झाली नाही आणि यांनी लाठीचार्ज केला. लेकर काय दहशतवादी आहे का ते? 18 -20 वर्षांची मुलं आहेत ती. तुम्ही दहशतवाद्यांना सोडून देतात आणि तुम्ही लेकरांवर लाठीचार्ज करता, सरकारने हे योग्य केलं नाही. 

सरकारने आधी त्यांच्या मागण्या ऐकायच्या होत्या, काय ते बघायचं होतं, आणि नंतर काय तो निर्णय घ्यायचा होता. आमचे लेकर तिथे काय मार खायला गेले होते का? असा सवाल अभिजीत दिपके यांची आई अनिता दिपके यांनी सरकारला केला आहे.

सोनम वांगचुक यांच्याबाबत कोर्टाचा मोठा निर्णय ; काय आहे बातमी?

वेध माझा ऑनलाईन।
दिल्लीतील NEET पेपरफुटी आंदोलनादरम्यान पर्यावरणवादी आणि सामाजिक कार्यकर्ते सोनम वांगचुक यांची प्रकृती बिघडल्याचं सांगितलं जात. ते उपोषणावर होते ज्यामुुळे त्यांना सफदरजंग रुग्णालयात दाखल करण्यात आले. याच प्रकरणात आता दिल्ली हायकोर्टाने महत्त्वाचे नवे निर्देश दिले आहेत.

यापूर्वी सोनम वांगचुक यांच्या पत्नी डॉ. गीतांजली आंग्मो यांनी न्यायालयात याचिका दाखल केली होती. दिल्ली पोलिसांनी त्यांच्या इच्छेविरुद्ध सफदरजंग रुग्णालयात दाखल केल्याचा दावा करत त्यांना खासगी रुग्णालयात हलवण्याची परवानगी द्यावी, अशी मागणी करण्यात आली होती. मात्र, त्या वेळी न्यायालयाने ही याचिका स्वीकारली नव्हती.

दरम्यान, आता या प्रकरणात मोठी घडामोड झाली आहे. ताज्या माहितीनुसार दिल्ली हायकोर्टाने सोनम वांगचुक यांची प्रकृती लक्षात घेऊन त्यांना मेदांता रुग्णालयात हलवण्याचे निर्देश दिले आहेत. तसेच, मेदांता रुग्णालयाच्या संचालकांना त्यांच्या उपचारासाठी तज्ज्ञ डॉक्टरांचे विशेष पॅनेल तयार करण्याचे आदेशही दिले आहेत.

न्यायालयाच्या आदेशानंतर आता मेदांता रुग्णालयातील तज्ज्ञ डॉक्टरांच्या देखरेखीखाली सोनम वांगचुक यांच्यावर उपचार होणार आहेत.

शरद पवार यांनी जंतर मंतरवर जाऊन अभिजीत दिपके यांची घेतली भेट ;

वेध माझा ऑनलाईन।
जंतर मंतरवर कॉकरोच जनता पार्टीचं आंदोलन सुरू आहे. सोमवारी पोलिसांकडून करण्यात आलेल्या लाठीचार्जानंतर आता वातावरण चांगलंच तापलं आहे. राष्ट्रवादी शरद पवार गटाचे अध्यक्ष शरद पवार यांनी आज जंतर मंतरवर जाऊन अभिजीत दिपके यांची भेट घेतली आहे. यावेळी त्यांनी अभिजीत दीपके यांच्याशी संवाद साधला आहे.  ‘सोनम वांगचुक यांच्यावर उपचार सुरू आहेत. त्यांना डिटेन केलंय एकप्रकारे. आमच्या मागण्या आहेत 

विद्यार्थ्यांविरोधातील गुन्हे मागे घ्यावेत. दिल्ली आणि मुंबईतील प्रधानचा राजीनामा झाला पाहिजे. आत्महत्या करण्यात आलेल्या कुटुंबीयांना प्रत्येकी १ कोटी रुपये द्यावे, सर्व आंदोलकांवरील देशातील एफआयआर मागे घ्या तसेच वांगचुक यांना सोडा. ही आमची मागणी आहे, आमच्या चार प्रमुख मागण्या आहेत, असं यावेळी अभिजीत दिपके यांनी यावेळी शरद पवार यांना म्हटलं.

दरम्यान यावर बोलताना शरद पवार यांनी म्हटलं की,  महाराष्ट्रात ३० महत्त्वाच्या जिल्ह्यात आंदोलन झालं. कोणताही कॉल नसताना हे आंदोलन झालं. तुम्हाला काय मदत पाहिजे, तसेच तुम्ही किती दिवस आंदोलन करणार आहात? असा सवालही यावेळी शरद पवार यांनी दीपके यांना केला. यावर बोलताना दिपके म्हणाले की,  ३१ दिवसांपासून इथे आहे. एक महिना झाला. काल जे झालं त्यामुळे सरकारचा राग आला आहे. आम्ही काय मागत होतो. आम्ही फक्त धर्मेंद्र प्रधान यांचा राजीनामा मागत होतो, असं दिपके यांनी यावेळी म्हटलं.