सातारा जिल्हा रुग्णालयातील महिला कर्मचाऱ्यास कोरोनाची लागण

सातारा : कोरोनाच्या संसर्गापासून बाजूला असलेल्या सातारा शहरातील सदरबझार परिसरात आज कोरोनाचा रूग्ण सापडला आहे. जिल्हा रूग्णालयात क्ष-किरण विभागात तंत्रज्ञ असलेल्या या महिला कर्मचाऱ्यास कोरोनाची लागण झाल्याचे पुणे येथून आलेल्या अहवालातून स्पष्ट झाले आहे.
सातारा जिल्ह्यात कोरोनाचे रूग्ण संख्या दिवसेंदिवस वाढत आहेत. हा वाढणारा संसर्ग रोखण्यासाठी जिल्हा महसूल प्रशासन, पोलिस आणि आरोग्य विभाग शर्तीचे प्रयत्न करत आहे. सातत्याने लोकांना घरात थांबा, घराबाहेर पडू नका, असे आवाहन जिल्हाधिकारी शेखर सिंह आणि पोलिस अधीक्षक  तेजस्वी सातपुते करत आहेत.