कोरोनामुक्तीच्या लढ्यात कृष्णा हॉस्पिटलची कामगिरी अव्वल दर्जाची राहिली आहे. हॉस्पिटलमधील स्वतंत्र कोरोना वॉर्डमध्ये आजच्या घडीला 205 हून अधिक कोरोना पॉझिटिव्ह रूग्णांवर उपचार सुरू आहेत. तसेच यशस्वी उपचाराने आत्तापर्यंत 452 रूग्णांना कोरोनामुक्त करण्यात यश आले आहे. दरम्यान, जिल्ह्यात गेल्या काही दिवसांत कोरोना पॉझिटिव्ह रूग्ण झपाट्याने वाढू लागल्याने, लोकांमध्ये भितीचे वातावरण आहे. त्यामुळे संशयित रूग्णांबरोबर ज्यांना कोरोनाची लक्षणे जाणवत आहेत, असे लोक स्वत:हून तपासणी करण्यासाठी हॉस्पिटलमध्ये दाखल होत आहेत.
अशा लक्षणे असणाऱ्या संशयित रूग्णांची योग्य पद्धतीने आणि सुरक्षितपणे तपासणी करता यावी, यासाठी कृष्णा हॉस्पिटलच्या प्रांगणात स्वतंत्रपणे कोरोना तपासणी केंद्र साकारले जात आहे. सर्व अद्ययावत सुविधांनी युक्त असणाऱ्या या केंद्रामध्ये प्रशिक्षित स्टाफ तैनात केला जाणार आहे. या केंद्रामध्ये तपासणीसाठी येणाऱ्या रूग्णांना मास्क, हॅन्ड सॅनिटायझरचा वापर व शारिरीक अंतर राखणे बंधनकारक असेल. याठिकाणी सर्दी, ताप, खोकला अशी लक्षणे असलेल्या रूग्णांची तपासणी करून, आवश्यकता भासल्यास स्वॅबची चाचणी करण्याची सोयही उपलब्ध करून दिली जाणार आहे. ज्या रूग्णांचे स्वॅबचे नमुने घेण्यात आले असतील, अशा रूग्णांना त्यांच्या चाचणीचा रिपोर्ट त्याचदिवशी रात्री 9 वाजेपर्यंत कळविला जाणार आहे.
कृष्णा हॉस्पिटलच्या बाहेरील प्रांगणात हे स्वतंत्र केंद्र करण्यात येत असल्याने, हॉस्पिटलच्या आत येणाऱ्या अन्य रूग्णांच्या सुरक्षेची काळजीही यानिमित्ताने घेतली जाणार आहे. अपंग व वृद्धांसाठी रॅम्पची सोयही या केंद्रात करण्यात आली असून, रूग्णांना तज्ज्ञांमार्फत समुदेशनही केले जाणार आहे. हे केंद्र लवकरच नागरिकांसाठी खुले केले जाणार असल्याचे डॉ. भोसले यांनी प्रसिद्धीपत्रकाद्वारे कळविले आहे.
No comments:
Post a Comment