कृष्णा नदीच्या पाण्याचा रंग निळसर-हिरवा झाल्याची घटना समोर येऊन अनेक दिवस उलटले असतानाही संबंधित यंत्रणांकडून अद्याप तपासणीचा अधिकृत अहवाल जाहीर करण्यात आलेला नाही. त्यामुळे नदीच्या पाण्याच्या गुणवत्तेबाबत नागरिकांमध्ये अस्वस्थता वाढत असून, प्रशासनाच्या कार्यपद्धतीवरही प्रश्न उपस्थित केले जात आहेत.
दरम्यान कृष्णा नदीच्या रंगबदलाचे नेमके कारण, त्याचा पिण्याच्या पाण्यावर होणारा परिणाम आणि भविष्यातील उपाययोजना याबाबत प्रशासनाकडून स्पष्ट भूमिका कधी मांडली जाते, याकडे संपूर्ण परिसराचे लक्ष लागले असून, या विषयाचा 'वेध माझा' सातत्याने पाठपुरावा करणार आहे.
सध्या पावसाळ्याला सुरुवात झाल्याने नदीत गढूळ पाण्याचा प्रवाह वाढला आहे. अशा परिस्थितीत नदीतील संभाव्य प्रदूषणाचे स्वरूप अधिक गंभीर होण्याची शक्यता पर्यावरण अभ्यासकांकडून व्यक्त केली जात आहे. पावसाच्या पाण्यासोबत विविध नाले, सांडपाणी आणि इतर घटक नदीत मिसळत असल्याने जलगुणवत्तेवर त्याचा परिणाम होऊ शकतो, अशीही चर्चा आहे.
कृष्णा नदी ही कराडसह परिसरातील लाखो नागरिकांच्या पिण्याच्या पाण्याचा प्रमुख स्रोत आहे. याच नदीवर शेती, पशुपालन आणि विविध उद्योग अवलंबून असल्याने या प्रश्नाकडे केवळ पर्यावरणीय नव्हे, तर सार्वजनिक आरोग्याच्या दृष्टीनेही गांभीर्याने पाहण्याची गरज व्यक्त होत आहे.
दरम्यान, नदीकाठच्या काही भागांमध्ये आजही पाण्यावर हिरवट थर दिसत असल्याचा दावा स्थानिक नागरिकांकडून केला जात आहे. मात्र या रंगबदलामागे शैवालांची वाढ, रासायनिक प्रदूषण, सांडपाणी की अन्य कोणते कारण आहे, याबाबत अद्याप अधिकृत माहिती समोर आलेली नाही. त्यामुळे अफवा आणि तर्क-वितर्कांना उधाण आले आहे.
विशेष म्हणजे, या संपूर्ण प्रकरणावर कराड उत्तर आणि कराड दक्षिण मतदारसंघातील लोकप्रतिनिधींकडून अद्याप ठोस भूमिका मांडण्यात आलेली नसल्याची चर्चा नागरिकांमध्ये सुरू आहे.
पर्यावरणप्रेमी, शेतकरी आणि सामाजिक कार्यकर्त्यांनी महाराष्ट्र प्रदूषण नियंत्रण मंडळ, जलसंपदा विभाग, आरोग्य विभाग आणि जिल्हा प्रशासन यांनी संयुक्तरीत्या नदीच्या पाण्याचे नमुने तपासून सविस्तर वैज्ञानिक अहवाल तातडीने सार्वजनिक करावा, तसेच आवश्यक असल्यास नागरिकांसाठी सावधगिरीच्या सूचना जारी कराव्यात, अशी मागणी पुन्हा केली आहे.
कृष्णा नदीच्या रंगबदलाचे नेमके कारण, त्याचा पिण्याच्या पाण्यावर होणारा परिणाम आणि भविष्यातील उपाययोजना याबाबत प्रशासनाकडून स्पष्ट भूमिका कधी मांडली जाते, याकडे संपूर्ण परिसराचे लक्ष लागले असून, या विषयाचा 'वेध माझा' सातत्याने पाठपुरावा करणार आहे.
दरम्यान नदीच्या प्रश्नावर प्रशासनाकडून तातडीने उत्तरदायित्व निश्चित करून तपासणी अहवाल जाहीर करण्यासाठी लोकप्रतिनिधींनी पुढाकार घ्यावा, अशी अपेक्षा व्यक्त होत आहे.
No comments:
Post a Comment