लायन्स क्लब ऑफ कराड नक्षत्रच्या सन २०२६-२७ या वर्षासाठी नव्या कार्यकारिणीचा पदग्रहण व शपथविधी सोहळा उत्साहपूर्ण वातावरणात संपन्न झाला. या वर्षासाठी अध्यक्षपदी लायन डॉ. राजश्री पालकर, सचिवपदी लायन जयश्री साने आणि खजिनदारपदी लायन विद्या मोरे यांनी पदभार स्वीकारला.
नवनियुक्त पदाधिकाऱ्यांना व्हाइस डिस्ट्रिक्ट गव्हर्नर (VDG-2) लायन मंगेश दोशी यांच्या हस्ते पद व शपथ देण्यात आली. कार्यक्रमाच्या अध्यक्षस्थानी ज्येष्ठ लायन , लायन जगदीश पुरोहित होते त्यांचे मार्गदर्शन लाभले.
या सोहळ्यास रिजन चेअरमन लायन महेंद्र कदम, झोन चेअरमन लायन गौरी चव्हाण यांच्यासह विविध सामाजिक, शैक्षणिक व सेवाभावी संस्थांचे पदाधिकारी, मान्यवर तसेच लायन्स क्लब ऑफ कराड नक्षत्रचे सदस्य मोठ्या संख्येने उपस्थित होते. उपस्थितांनी नवनियुक्त कार्यकारिणीचे अभिनंदन करून त्यांच्या पुढील वाटचालीस शुभेच्छा दिल्या.
यावेळी मान्यवरांनी आपल्या मनोगतात लायन्स चळवळीची सेवा, समर्पण आणि मानवतेची परंपरा अधिक बळकट करण्याचे आवाहन केले. आरोग्य, शिक्षण, पर्यावरण संवर्धन, महिला सक्षमीकरण, युवा विकास, रक्तदान, नेत्रदान जनजागृती तसेच गरजूंसाठी विविध सेवाभावी उपक्रम नव्या कार्यकारिणीच्या नेतृत्वाखाली अधिक व्यापक स्वरूपात राबविले जातील, असा विश्वास व्यक्त करण्यात आला.
नवनियुक्त अध्यक्ष डॉ. राजश्री पालकर यांनी क्लबच्या सर्व सदस्यांना सोबत घेऊन समाजहिताला प्राधान्य देत नावीन्यपूर्ण आणि परिणामकारक उपक्रम राबविण्याचा संकल्प व्यक्त केला. सचिव जयश्री साने यांनी संघटनात्मक कामकाज अधिक गतिमान व नियोजनबद्ध करण्याची भूमिका मांडली, तर खजिनदार विद्या मोरे यांनी आर्थिक पारदर्शकता, शिस्त आणि सेवाभावी प्रकल्पांना सक्षम पाठबळ देण्यासाठी कटिबद्ध असल्याचे सांगितले.
कार्यक्रमाचे नियोजन नेटके व आकर्षक पद्धतीने करण्यात आले. उपस्थित मान्यवरांनी नव्या कार्यकारिणीला शुभेच्छा देत, त्यांच्या नेतृत्वाखाली लायन्स क्लब ऑफ कराड नक्षत्र समाजसेवेची उज्ज्वल परंपरा अधिक समृद्ध करेल, असा विश्वास व्यक्त केला.
No comments:
Post a Comment