वेध माझा ऑनलाईन ।
कृष्णा नदीच्या पाण्याचा रंग निळसर-हिरवा होण्याची घटना समोर येऊन अनेक दिवस उलटले तरी संबंधित यंत्रणांकडून अद्याप कोणताही अधिकृत तपासणी अहवाल जाहीर करण्यात आलेला नाही. त्यामुळे नदीच्या पाण्याच्या गुणवत्तेबाबत नागरिकांमध्ये निर्माण झालेली चिंता दिवसेंदिवस वाढत असून, प्रशासनाच्या भूमिकेबाबतही प्रश्नचिन्ह उपस्थित होत आहे.दरम्यान सध्या पाऊस सुरू आहे त्यामुळे निर्माण होणाऱ्या गढूळ पाणी पाण्यातील प्रदूषण वाढीस कारणीभूत ठरण्याची शक्यता बोलली जात आहे तरीही या प्रकाराबाबत कराड दक्षिण आणि उत्तरच्या आमदारांचे मौन असणे ही बाब सध्या चर्चेत आहे
कृष्णा नदी ही कराडसह परिसरातील लाखो नागरिकांच्या पिण्याच्या पाण्याचा प्रमुख स्रोत आहे. याच नदीवर शेती, पशुपालन आणि विविध उद्योगही अवलंबून आहेत. अशा परिस्थितीत नदीच्या पाण्याचा रंग अचानक बदलल्यानंतर तातडीने वैज्ञानिक तपासणी होऊन त्याचे निष्कर्ष जनतेसमोर येणे अपेक्षित होते. मात्र अद्याप कोणतीही स्पष्ट माहिती न दिल्याने नागरिकांमध्ये संभ्रमाचे वातावरण कायम आहे.
नदीकाठच्या अनेक भागांत आजही पाण्यावर हिरवट थर दिसत असल्याचा दावा स्थानिक नागरिकांकडून केला जात आहे. काही ठिकाणी पाणी निळसर-हिरव्या रंगाचे दिसत असल्याने जलप्रदूषण, शैवालांची वाढ, रासायनिक घटकांचे प्रमाण किंवा सांडपाण्याचा परिणाम अशा विविध शक्यता व्यक्त होत आहेत. मात्र यापैकी नेमके कारण कोणते, याबाबत अधिकृत खुलासा झालेला नाही.
विशेष म्हणजे, हा विषय सातत्याने चर्चेत असतानाही संबंधित विभागांकडून संयुक्त पाहणी, जनजागृती किंवा नागरिकांना सावधगिरीच्या सूचना देण्यात आलेल्या नाहीत. लोकप्रतिनिधींनीही या विषयावर ठोस भूमिका घेऊन प्रशासनाकडून उत्तरदायित्वाची मागणी करावी, अशी अपेक्षा नागरिक व्यक्त करत आहेत.
पर्यावरणप्रेमी, शेतकरी आणि सामाजिक कार्यकर्त्यांनी महाराष्ट्र प्रदूषण नियंत्रण मंडळ, जलसंपदा विभाग, आरोग्य विभाग आणि जिल्हा प्रशासन यांनी तातडीने पाण्याचे नमुने तपासून सविस्तर अहवाल सार्वजनिक करावा, तसेच नदीतील रंगबदलामागील नेमके कारण जाहीर करून आवश्यक उपाययोजना कराव्यात, अशी मागणी पुन्हा एकदा केली आहे.
दरम्यान, नागरिकांच्या आरोग्याशी आणि पर्यावरणाशी थेट संबंधित असलेल्या या गंभीर विषयाचा 'वेध माझा'कडून सातत्याने पाठपुरावा सुरू राहणार असून, प्रशासन याबाबत नेमकी कोणती भूमिका घेते आणि तपासणी अहवाल कधी जाहीर होतो, याकडे संपूर्ण परिसराचे लक्ष लागले आहे.
आज रविवारची बातमी🙏
No comments:
Post a Comment