..."ती' महिला वाहतूक पोलीस निलंबित

 कराड 

पिंपरी मधील एका चौकात वाहतुकीचे नियमन करत असताना एका वाहतूक पोलीस महिलेने कारवाई न करण्यासाठी एका तरुणी कडून पैसे घेतल्याचा व्हिडीओ सम्पूर्ण महाराष्ट्रात चर्चेचा विषय बनला होता. त्याबाबत वाहतूक विभागाकडून कारवाई करण्यात आली असून, कसुरी अहवाल सादर केल्यानंतर गुरुवारी रात्री संबंधित वाहतूक पोलीस महिलेचे निलंबन करण्यात आले असल्याचे समजते.

      स्वाती सोन्नर असे निलंबन झालेल्या वाहतूक पोलीस महिलेचे नाव आहे. त्या वाहतूक शाखेच्या पिंपरी विभागात कार्यरत आहेत. सोन्नर आणि त्यांचे सहकारी वाहतूक पोलीस मंगळवारी (दि.१५) पिंपरी मधील साई चौकात कर्तव्य बजावत होत्या. दरम्यान तिथे एका दुचाकीवरून दोन तरुणी आल्या, वाहतुकीच्या नियमांचे उल्लंघन केल्याप्रकरणी त्यांच्यावर कारवाई करण्यात येणार असल्याचे संबंधित वाहतूक पोलीस महिलेने त्यांना सांगितले.ही कारवाई टाळण्यासाठी काही रक्कम घेण्याची तोड निघाली आणि त्या वाहतूक पोलीस महिलेने अनोख्या पद्धतीने ती रक्कम स्वीकारली.

     एका तरुणीने चक्क वाहतूक पोलीस महिलेच्या खिशात पैसे ठेवले आणि याचा व्हीडिओ सोशल मीडियावर चांगलाच व्हायरल झाला. वरिष्ठ पोलीस अधिका-यांपर्यंत हा व्हिडीओ जाऊन पोहोचला आणि नंतर कारवाईची प्रक्रिया सुरु झाली. सहाय्यक आयुक्तांनी याबाबत कसुरी अहवाल उपायुक्तांकडे सादर केला,त्यावर निर्णय घेत सोन्नर यांचे निलंबन करण्यात आले असल्याचे गुरुवारी (दि. १७) रात्री समजले.