प्रसिद्ध गायक महेश काळे करोना पॉझिटिव्ह, म्हणाले- 'लस आणि काळजी घेऊनही झाली लागण

प्रसिद्ध शास्त्रीय गायक महेश काळे यांना करोनाची लागण झाली आहे. विशेष म्हणजे काही दिवसांपूर्वी त्यांनी करोनाची लसही घेतली होती. पण त्यानंतरही लागण झाल्यानंतर त्यांनी स्वतःला क्वारन्टीन करून घेतलं आहे.बॉलिवूड आणि टीव्ही कलाकारांमध्ये करोनाचं संक्रमण दिवसेंदिवस वाढताना दिसत आहे. प्रसिद्ध गायक महेश काळे यांना करोनाची लागण झाली आहे. स्वतः महेश यांनी त्यांच्या सोशल मीडिया अकाउंटवरून ही माहिती चाहत्यांना दिली.

महेश यांनी ट्वीट करत म्हटलं की, 'अतिशय काटेकोर पद्धतीने सर्व नियमांचं पालन करून आणि अत्यंत काळजी घेऊन मला करोनाची लागण झाली. विशेष म्हणजे मी करोनाचं लसीकरणंही केलं होतं. डॉक्टरांच्या म्हणण्यानुसार अगदी अल्पप्रमाणात करोनाची लागण झाली आहे. तरीही मी स्वतःला क्वारन्टीन करून घेतलं आहे. जोवर डॉक्टर मला मी पूर्णपणे बरा झाल्याचं सांगत नाहीत तोवर मी क्वारन्टीनच राहीन. तुम्हा सर्वांच्या प्राथनेसाठी मनापासून आभार.'

महेश काळे 'सुर नवा ध्यास नवा.. आशा उद्याची' या गायनाच्या रिअॅलिशी शोमधून प्रेक्षकांच्या भेटीला येणार आहेत. येत्या ५ एप्रिलपासून हा शो कर्लस मराठीवर दाखवण्यात येईल. दरम्यान, राज्यात गेल्या काही दिवसांपासून करोनाचा उद्रेक पाहायला मिळत आहे. सलग दोन दिवस २५ हजारावर नवीन बाधितांची नोंद झाली आहे.