गणेशोत्सवात भक्तीसोबत सामाजिक बांधिलकी! दिपकदादा पाटील यांच्या नेतृत्वाखाली सोमवार पेठेतील श्री बाल गणेश मंडळाचा स्तुत्य उपक्रम; रोटरी क्लबच्या सहकार्याने रक्तदान शिबिर, 40 ते 50 जणांचा सहभाग,:

वेध माझा ऑनलाइन।

: गणेशोत्सव म्हणजे केवळ उत्सव, रोषणाई आणि देखावे नव्हे, तर सामाजिक बांधिलकी जपण्याचीही संधी! याच भावनेतून युवा नेते दिपकदादा पाटील यांच्या नेतृत्वाखाली कराड रोटरी क्लब आणि सोमवार पेठेतील श्री बाल गणेश मंडळाच्या संयुक्त विद्यमाने गुरुवारी रक्तदान शिबिराचे आयोजन करण्यात आले. या शिबिराला नागरिकांचा उत्स्फूर्त प्रतिसाद मिळाला असून सुमारे 40 ते 50 जणांनी रक्तदान करून सामाजिक बांधिलकी जपली.

सोमवार पेठेतील श्री बाल गणेश मंडळाची धुरा दिपकदादा पाटील यांनी स्वीकारल्यापासून गणेशोत्सवाच्या माध्यमातून विविध सामाजिक आणि सांस्कृतिक उपक्रमांना चालना मिळत आहे. दरवर्षी मंडळाकडून आकर्षक गणेशमूर्ती, देखावे, विद्युत रोषणाई तसेच विविध उपक्रमांचे आयोजन करण्यात येते. यंदाच्या गणेशोत्सवात या परंपरेला सामाजिक उपक्रमाची जोड देत रक्तदान शिबिर आयोजित करण्यात आले.

आज गुरुवारी सकाळी रोटरी क्लबचे अध्यक्ष चंद्रशेखर पाटील यांच्या हस्ते रक्तदान शिबिराचे उद्घाटन करण्यात आले. रोटरी क्लबचे प्रबोध पुरोहित आणि मंडळाचे आधारस्तंभ दिपकदादा पाटील यांच्या पुढाकारातून हा उपक्रम यशस्वीपणे पार पडला.

रक्ताची गरज असलेल्या रुग्णांना वेळेत रक्त उपलब्ध व्हावे, या उद्देशाने आयोजित करण्यात आलेल्या शिबिरात युवकांसह नागरिकांनी उत्स्फूर्त सहभाग घेतला. 40 ते 50 रक्तदात्यांनी रक्तदान करून ‘गणपती बाप्पा’च्या उत्सवाला समाजसेवेची जोड दिली.

यावेळी मंडळाचे अध्यक्ष उपाध्यक्ष, खजिनदार, मंडळाचे सभासद आणि कार्यकर्ते मोठ्या संख्येने उपस्थित होते.

गणेशोत्सवातील आनंदासोबतच ‘रक्तदान हेच श्रेष्ठ दान’ या भावनेतून राबविण्यात आलेल्या या उपक्रमाचे नागरिकांकडून कौतुक करण्यात आले.