आ. डॉ. अतुलबाबांच्या पुढाकारातून उद्या विविध साहित्याचे होणार मोफत वितरण ; तब्बल ८०.७८ लाख रुपयांच्या विविध साहित्याचे होणार वाटप; ९२१ दिव्यांग व ज्येष्ठ नागरिकांना मिळणार मदतीचा आधार!

वेध माझा ऑनलाईन।

 भारताचे लोकप्रिय पंतप्रधान नरेंद्र मोदी यांच्या वाढदिवसानिमित्त उद्या गुरुवार दि. १७ सप्टेंबर रोजी पाचवड फाटा (ता. कराड) येथील आनंद मल्टिपर्पज हॉलमध्ये दिव्यांग व ज्येष्ठ नागरिकांसाठी नि:शुल्क साहित्य वाटप शिबिराचे आयोजन करण्यात येेेणार आहे. या शिबीरात तब्बल ९२१ पात्र दिव्यांग व ज्येष्ठ नागरिकांना कृष्णा विश्व विद्यापीठाचे कुलपती डॉ. सुरेश भोसले आणि आमदार डॉ. अतुलबाबा भोसले यांच्या हस्ते विविध सहाय्यभूत साहित्याचे वितरण करण्यात येणार आहे.

भारत सरकारच्या सामाजिक न्याय व अधिकारिता मंत्रालयाच्या दिव्यांग सक्षमीकरण विभाग योजनेंतर्गत डॉ. सुरेश भोसले यांच्या मार्गदर्शनाखाली आणि आमदार डॉ. अतुलबाबा भोसले यांच्या पुढाकाराने दिनांक १ ते ३ जुलै दरम्यान कोयना वसाहत (ता. कराड) येथे दिव्यांग व ज्येष्ठ नागरिकांसाठी तपासणी शिबीर घेण्यात आले. यापैकी ९२१ पात्र लाभार्थ्यांना आ.डॉ. अतुलबाबा भोसले यांच्या विशेष प्रयत्नामुळे तब्बल ८०.७८ लाख रुपयांचे विविध सहाय्यभूत साहित्य मंजूर झाले आहे. यामध्ये व्हीलचेअर, व्हीलचेअर विथ कमोड, काठी, कानाचे मशीन, कंबर पट्टा, गुडघ्याचा पट्टा, नेक बेल्ट, स्मार्ट फोन, पाठीचा पट्टा, कमोड चेअर अशा साहित्याचा समावेश आहे. 

या साहित्याचे नि:शुल्क वितरण पात्र दिव्यांग व ज्येष्ठ नागरिकांना पंतप्रधान नरेंद्र मोदी यांच्या वाढदिवसानिमित्त उद्या गुरुवार दि. १७ सप्टेंबर रोजी पाचवड फाटा येथील आनंद मल्टिपर्पज हॉलमध्ये सकाळी १० वाजता करण्यात येणार आहे. कार्यक्रमाला येताना पात्र लाभार्थ्यांनी आपले मूळ आधार कार्ड सोबत आणावे, असे आवाहन संयोजकांच्यावतीने करण्यात आले आहे. या उपक्रमामुळे दिव्यांग व ज्येष्ठ नागरिकांना त्यांचे दैनंदिन जीवन अधिक सुलभ होण्यास मदत होणार आहे.

***