येत्या ५ वर्षात कृष्णा कारखान्याच्या इतिहासातील सर्वात मोठे विस्तारीकरण करणार ; डॉ सुरेश भोसले ; विक्रमी उत्पादन करणारा कृष्णा कारखाना राज्यात दुसऱ्या क्रमांकावर ; आमदार अतुल भोसले;

वेध माझा ऑनलाइन 

कृष्णा सहकारी साखर कारखान्याचा प्रवास हा १२०० मेट्रिक टन ते १२ हजार मेट्रिक टन असा झाला आहे.या कालखंडात कारखान्याने अनेक महत्त्वपूर्ण टप्पे पार केले आहेत.पण येत्या ५ वर्षात कारखान्याच्या इतिहासातील सर्वात मोठे विस्तारीकरण करण्यात येणार आहे.मला पाठीमागे चांगले काम केल्याच्या पाऊलखुणा ठेवून जायचे आहे असे सांगत आता आपली ही शेवटचीच टर्म असल्याचे प्रतिपादन कृष्णा सहकारी साखर कारखान्याचे अध्यक्ष डॉ. सुरेश भोसले यांनी केले. 

शिवनगर ता.कराड येथे यशवंतराव मोहिते कृष्णा सहकारी साखर कारखान्याची ७० वी वार्षिक सर्वसाधारण सभा मंगळवारी उत्साहात पार पडली.सभेच्या अध्यक्षस्थानी डॉ.सुरेश भोसले होते.तर आमदार डॉ. अतुल भोसले,माजी आमदार भगवानराव साळुंखे, कारखान्याचे उपाध्यक्ष जयवंत मोरे यांच्यासह कारखान्याचे संचालक मंडळ ,कराड मलकापूर नगरपालिकेचे नगरसेवक, पंचायत समितीचे सदस्य आदींची प्रमुख उपस्थिती होती.

डॉ.सुरेश भोसले म्हणाले की, आज कारखाना समोर अनेक प्रश्नही आहेत.शेतीमध्ये सुधारणा गरजेची आहे. कारखाना पुरस्कृत उपसा जलसिंचन योजनेंचा प्रश्न मोठा आहे. त्यामुळेच त्यांचे सध्या ऑडिट सुरू केले आहे. त्यानंतर या योजनांचे नूतनीकरण की आधुनिकीकरण करायचे याचा निर्णय घेता येईल.क्षारपड जमिनीचा प्रश्न वेगळाच आहे. त्यासाठी ड्रिनेज व्यवस्था गरजेची आहे.कार्यस्थळावक्र सुधारणा करायची आहे.कर्मचाऱ्यांची कॉलनी,अंतर्गत रस्ते हे करावे लागणार आहे. कारखान्याच्या आवारात साखर ठेवण्यासाठी ५ लाख पोती क्षमतेचे एकच गोडाऊन बांधण्याचा मानस आहे.

मध्यंतरी साखरेचे दर वाढले की शेतकरी संघटनांनी लगेच पुढच्या बिलाची मागणी केली. पण हे दर लगेचच कमी झाले.आज जडात युद्धजन्य परिस्थिती आहे.त्याचेही कारखानदारीवर परिणाम होणार आहेत.इंधन दर वाढले तर वाहतूक खर्च वाढणार आहे.इतर अनेक बाबी समोर येणार आहेत. पण संकटे असली तरी कृष्णा दरात कमी पडणार नाही पुढेच राहणार असा विश्वास डॉ.सुरेश भोसले यांनी यावेळी बोलताना सभासदांना दिला. 

आमदार डॉ.अतुल भोसले म्हणाले की,गत संचालक मंडळांने चांगले काम केले यावर नुकत्याच झालेल्या निवडणुकीत निकालने शिक्कामोर्तब झाले आहे. संचालक मंडळाने गत ११ वर्षात २६९ कोटींचे दीर्घ मुक्तीचे कर्ज विविध बँकेत भरले आहे. विक्रमी गाळप विक्रमी, विक्रमी उत्पादन करणारा कृष्णा कारखाना राज्यात दुसऱ्या क्रमांकावर आहे ही बाब आपणा सर्वांसाठी अभिमानाची आहे. 

कृष्णा कारखान्याच्या अनेक निवडणुकीत विरोधकांनी आम्ही त्याचे खाजगीकरण करू म्हणून बेछुट आरोप केले.पण तसे घडले आहे का? असा प्रश्न सभासदांना करीत तुम्ही मोठ्या विश्वासाने हा कारखाना संचालक मंडळाकडे दिला आहे.त्यामुळे हा कारखाना उद्याही सहकारीच राहणार असे मत आमदार डॉ .अतुल भोसले यांनी यावेळी व्यक्त केले.

विषय पत्रिकेचे वाचन मॅनेजिंग डायरेक्टर बाजीराव सुतार यांनी केले.उपस्थितांचे स्वागत उपाध्यक्ष जयवंत मोरे यांनी केले. संचालक धोंडीराम जाधव यांनी आभार मानले.