कराडच्या शुक्रवार पेठेतील जय जवान श्री गणेश मंडळाच्या सुवर्ण महोत्सवी वर्षानिमित्त यंदा तिरुपती बालाजी मंदिराची हुबेहूब प्रतिकृती साकारण्यात आली आहे. भव्य आणि आकर्षक देखाव्यामुळे हा देखावा गणेशभक्तांसह कराडकरांच्या आकर्षणाचा केंद्रबिंदू ठरला असून, दर्शन व देखावा पाहण्यासाठी भाविकांची मोठी गर्दी होत आहे.
जय जवान श्री गणेश मंडळाने गेल्या अनेक वर्षांपासून कराडच्या गणेशोत्सवाला सामाजिक, सांस्कृतिक आणि कलात्मक देखाव्यांची वेगळी ओळख निर्माण करून दिली आहे. यंदा मंडळाचे ५० वे वर्ष अर्थात सुवर्ण महोत्सवी वर्ष असल्याने विशेष आकर्षक देखावा साकारण्यात आला आहे.
मंडळाच्या आतापर्यंतच्या गाजलेल्या देखाव्यांमध्ये इच्छापूर्ती कलश, भुताची गुहा, चालता-बोलता प्रश्नमंजुषा, अष्टविनायक दर्शन, अक्षरधाम मंदिर, एड्स जनजागृती सजीव देखावा आणि गंगोत्री मंदिर यांचा समावेश आहे. या देखाव्यांना कराडकरांनी उत्स्फूर्त प्रतिसाद दिला होता. त्याच परंपरेला पुढे नेत यंदा तिरुपती बालाजी मंदिराची भव्य प्रतिकृती साकारण्यात आली आहे.
सुवर्ण महोत्सवाच्या प्रारंभप्रसंगी नगराध्यक्ष राजेंद्रसिंह यादव, उपनगराध्यक्ष पोपटराव साळुंखे, पालिकेचे विरोधी पक्षनेते विजय वाटेगावकर, नगरसेविका किशोरी शिंदे, नगरसेवक आशुतोष डुबल तसेच भाजप युवा नेते अतुल शिंदे यांच्या प्रमुख उपस्थितीत कार्यक्रम पार पडला.
यावेळी जय जवान श्री गणेश मंडळ उत्सव समिती २०२६चे अध्यक्ष सचिन औंधकर, उपाध्यक्ष अमोल पोकळे, खजिनदार संदीप कालेकर, सचिव प्रसाद तोडकर, तसेच ट्रस्टी मंडळाचे अध्यक्ष शंतनू कालेकर, उपाध्यक्ष प्रशांत माळवदे, खजिनदार उमेश बाचल, सचिव आकाश बाचल यांच्यासह मंडळाचे पदाधिकारी, कार्यकर्ते आणि भाविक उपस्थित होते.
सामाजिक बांधिलकी, सांस्कृतिक परंपरा आणि कलात्मक देखाव्यांची परंपरा जपणाऱ्या जय जवान मंडळाच्या सुवर्ण महोत्सवी वर्षातील तिरुपती बालाजी मंदिराच्या प्रतिकृतीने यंदाच्या गणेशोत्सवात विशेष रंग भरला आहे.
No comments:
Post a Comment