सह्याद्री साखर कारखान्याच्या सभेत सत्ताधारी-विरोधक आमनेसामने; सभास्थळी राडा५६ वी वार्षिक सर्वसाधारण सभा अवघ्या १५ मिनिटांत गुंडाळल्याचा विरोधकांचा आरोप; आमदार मनोज घोरपडे, धैर्यशील कदम यांची प्रतिसभा

वेध माझा ऑनलाईन।

सह्याद्री सहकारी साखर कारखान्याची ५६ वी वार्षिक सर्वसाधारण सभा आज सत्ताधारी व विरोधी गटातील कार्यकर्त्यांच्या गोंधळामुळे चर्चेत आली. सभेच्या ठिकाणी दोन्ही गटांचे कार्यकर्ते आमनेसामने आल्याने काही काळ तणावाचे वातावरण निर्माण झाले. परिस्थिती नियंत्रणात ठेवण्यासाठी सभास्थळी मोठा पोलीस बंदोबस्त तैनात करण्यात आला होता.

भाजपचे आमदार मनोज घोरपडे आणि विधान परिषद आमदार धैर्यशील कदम हे कार्यकर्त्यांसह सभास्थळी उपस्थित झाले. यावेळी दोन्ही गटांतील कार्यकर्त्यांमध्ये हमरीतुमरी झाल्याचे पाहायला मिळाले. त्यामुळे सभास्थळी काही काळ गोंधळाचे वातावरण निर्माण झाले. पोलिसांनी दोन्ही गटांच्या कार्यकर्त्यांना शांततेचे आवाहन केले; मात्र काही काळ कार्यकर्ते ऐकण्याच्या मनःस्थितीत नसल्याचे चित्र होते.

दरम्यान, मुख्य सभा गुंडाळल्यानंतर आमदार मनोज घोरपडे व आमदार धैर्यशील कदम यांनी त्याच ठिकाणी प्रतिसभा घेत सत्ताधारी गटावर प्रश्नांची सरबत्ती केली. "बाळासाहेब पाटील यांनी सभा का गुंडाळली? ६५० कोटी रुपयांचे कर्ज कशासाठी घेतले? या कर्जाची परतफेड कशी करणार?" असे सवाल उपस्थित करण्यात आले.

सह्याद्री साखर कारखाना हा शेतकरी सभासदांच्या मालकीचा असून सभासदांना कारखान्याच्या कारभाराबाबत प्रश्न विचारण्याचा आणि त्याची उत्तरे मिळण्याचा अधिकार आहे. मात्र, सभा अवघ्या १५ मिनिटांत गुंडाळण्यामागचे कारण काय, असा सवालही आमदार घोरपडे व कदम यांनी प्रतिसभेत उपस्थित केला.

"कारखान्याच्या आर्थिक व्यवहारांसह ६५० कोटी रुपयांच्या कर्जाबाबत सरकार दरबारी चौकशी लावणार," असे आमदार मनोज घोरपडे व आमदार धैर्यशील कदम यांनी पत्रकारांशी बोलताना सांगितले.

सह्याद्री सहकारी साखर कारखाना शेतकरी सभासदांसाठी महत्त्वाचा असून तो शेतकऱ्यांच्या मालकीचा कायम टिकला पाहिजे, यासाठी आपला प्रयत्न असल्याचेही दोन्ही आमदारांनी यावेळी स्पष्ट केले.

या संपूर्ण प्रकारामुळे सह्याद्री कारखान्याच्या वार्षिक सर्वसाधारण सभेत पुन्हा एकदा सत्ताधारी आणि विरोधी गटातील संघर्ष चव्हाट्यावर आला असून, ६५० कोटींच्या कर्जाचा मुद्दा तसेच मोफत साखर देण्याचे जाहीर करूनही ती साखर मोफत का दिली जात नाही... या मुद्यांसह अवघ्या १५ मिनिटांत सभा गुंडाळल्याचा आरोप देखील चर्चेत असल्याने कारखान्याच्या कारभाराबाबत आगामी काळात राजकीय वातावरण तापण्याची शक्यता आहे.

दरम्यान पत्रकारांशी बोलताना कारखान्याचे चेअरमन बाळासाहेब पाटील यांनी विरोधक आमदारांचे सर्व आरोप फेटाळून लावले