क्रेडाई कराडच्या विविध मागण्यांवर नगरपरिषद प्रशासनाची सकारात्मक चर्चा

वेध माझा ऑनलाईन।

नगराध्यक्ष राजेंद्रसिंह यादव यांच्या अध्यक्षतेखाली क्रेडाई कराडचे पदाधिकारी,  मुख्याधिकारी, कर अधिकारी तसेच नगररचना विभागातील अधिकारी यांच्या उपस्थितीत कराड शहरातील मालमत्ता कर व नगररचना विषयक विविध मुद्द्यांवर सकारात्मक नुकतीच चर्चा करण्यात आली.

क्रेडाई कराडच्या पदाधिकाऱ्यांनी प्रत्यक्ष भाड्याने देण्यात आलेल्या मालमत्तांवरील मालमत्ता कराची आकारणी तुलनेने अधिक होत असल्याचे निदर्शनास आणून दिले. सदर कर आकारणीमुळे मोठ्या ब्रॅण्ड्सना कराड शहरात व्यवसायासाठी आकर्षित करण्यात अडचणी येत असून, त्याचा शहराच्या आर्थिक विकास व रोजगारनिर्मितीवर परिणाम होत असल्याचे त्यांनी नमूद केले. पुणे, नाशिक आदी शहरांमध्ये वाणिज्य वापराच्या तुलनेत आकारण्यात येणाऱ्या कराच्या धर्तीवर कराड शहरातील कर आकारणीबाबत शासनस्तरावर सकारात्मक विचार करण्यात यावा, अशी मागणी करण्यात आली.

तसेच, मालमत्ता करासाठी करपात्र/दरयोग्य मूल्य निश्चित करताना केवळ प्रत्यक्ष भाडे, बाजारभाडे, व्यावसायिक उलाढाल किंवा उत्पन्न यांचा आधार न घेता मिळकतीची वाजवी वार्षिक भाडेक्षमता व लागू असलेल्या कायदेशीर तरतुदींचा विचार करण्यात यावा, असा मुद्दाही क्रेडाईच्या पदाधिकाऱ्यांनी उपस्थित केला. याबाबत प्रशासनाने विद्यमान कायद्यातील तरतुदीनुसार कर आकारणी होत असल्याचे स्पष्ट केले. सदर विषयासाठी आवश्यक कायद्यातील बदल शासनस्तरावर होणे अपेक्षित असल्याचे प्रशासनाने नमूद केले.

मा. नगराध्यक्ष यांनी क्रेडाई कराड यांनी मांडलेल्या मागण्या व शहराच्या विकासाच्या दृष्टीने उपस्थित केलेले मुद्दे रास्त असल्याचे नमूद करून, प्राप्त निवेदनानुसार सकारात्मक कार्यवाही करण्याची भूमिका व्यक्त केली. याबाबत सर्वसाधारण सभेत चर्चा झाल्याप्रमाणे आवश्यक ठराव मंजूर करून प्रस्ताव शासनाकडे पाठविण्यास मा. नगराध्यक्ष यांनी मान्यता दिली.

नगररचना विषयक विविध मुद्द्यांवरही सकारात्मक चर्चा

बैठकीदरम्यान कराड शहरातील पुररेषा व नगररचना विषयक महत्त्वाच्या बाबींवरही सविस्तर चर्चा करण्यात आली. यामध्ये ब्ल्यू लाईन व रेड लाईन पुररेषेचे अद्ययावत डिजिटल सर्वेक्षणाच्या माध्यमातून फेरसर्वेक्षण व पुनर्लोकन करणे, नदीपात्र व ब्ल्यू लाईनदरम्यानच्या क्षेत्रात चिपळूण व कोल्हापूर शहरांच्या धर्तीवर बांधकाम परवानगीबाबत विचार करणे, नदीपात्र व रेड लाईनदरम्यानच्या क्षेत्रात बेसमेंट पार्किंगला परवानगी देणे तसेच पुररेषेमुळे बाधित शहरांच्या समस्यांबाबत गठीत समितीमध्ये मा. नगराध्यक्ष किंवा मा. मुख्याधिकारी, कराड नगरपरिषद यांचा समावेश करण्याबाबत चर्चा करण्यात आली.

वरील सर्व विषयांवर उपस्थितांमध्ये सकारात्मक व विधायक चर्चा झाली असून, कराड शहराच्या नियोजनबद्ध विकासाला चालना देण्यासाठी शासनाच्या प्रचलित नियम व धोरणांच्या चौकटीत आवश्यक त्या बाबींचा पाठपुरावा करण्याबाबत सकारात्मक भूमिका व्यक्त करण्यात आली.

या बैठकीस नगरपरिषद सदस्य मा. श्री. जयंत काका पाटील, मा. श्री. अल्ताफभाई शिकलगार, मा. श्री. फारुखभाई पटवेकर, क्रेडाई कराडचे अध्यक्ष दीपक रेनाक, तनय जाधव, सतीश यादव, महेश पाटील, आपासाहेब पवार, मकरंद जाखलेकर, आदिक पवार, प्रशांत पाटील (सेक्रेटरी), अमित सूर्यवंशी, ओंकार कुंभार यांच्यासह कराड नगरपरिषदेचे अधिकारी, कर्मचारी व इतर पदाधिकारी उपस्थित होते.

कराड शहराचा आर्थिक, व्यावसायिक व नियोजनबद्ध विकास साधण्यासाठी प्रशासन आणि बांधकाम व्यावसायिक यांच्यात समन्वयातून सकारात्मक पावले उचलण्याच्या दृष्टीने ही बैठक महत्त्वपूर्ण ठरली.