गरज सांगण्यासाठी दिव्यांगांना कार्यालयांचे उंबरठे झिजवावे लागू नयेत, तर मदतच त्यांच्या दारी पोहोचली पाहिजे! या भूमिकेतून कराड दक्षिण विधानसभा मतदारसंघात दिव्यांग बांधव आणि ज्येष्ठ नागरिकांसाठी सामाजिक बांधिलकी जपणारा उपक्रम राबविण्यात आला. पंतप्रधान नरेंद्र मोदी यांच्या वाढदिवसानिमित्त केंद्र सरकारच्या सामाजिक न्याय व अधिकारिता मंत्रालयाच्या योजनेअंतर्गत 921 दिव्यांग बांधवांना सुमारे 80 लाख रुपये किमतीचे सहाय्यभूत साहित्य वितरित करण्यात आले.
या उपक्रमामुळे दैनंदिन जीवनातील अनेक अडचणींना सामोरे जाणाऱ्या दिव्यांग बांधवांना मोठा आधार मिळाला. आमदार डॉ. अतुलबाबा भोसले आणि विनायक भोसले यांच्या हस्ते लाभार्थ्यांना विविध उपयोगी साहित्याचे वितरण करण्यात आले.
विशेष म्हणजे, केवळ कार्यक्रम आयोजित करून लाभार्थ्यांना बोलावून घेण्याऐवजी दिव्यांग बांधवांची माहिती संकलित करण्यासाठी टीमच्या माध्यमातून घरोघरी जाऊन रजिस्ट्रेशन करण्यात आले. त्यामुळे पात्र लाभार्थ्यांपर्यंत योजनेचा लाभ पोहोचविण्याचा प्रयत्न करण्यात आला.
40-50 हजारांच्या वस्तूही लाभार्थ्यांच्या हाती
दिव्यांग बांधवांच्या गरजेनुसार विविध सहाय्यभूत साधनांचे वितरण करण्यात आले. यातील काही साहित्याची किंमत 40 ते 50 हजार रुपयांपर्यंत असल्याची माहिती आमदार अतुल भोसले यांनी दिली. त्यामुळे आर्थिकदृष्ट्या अडचणीत असलेल्या कुटुंबांना या मदतीचा थेट फायदा होणार आहे.
दिव्यांगांसोबत ज्येष्ठ नागरिकांनाही आधार
या उपक्रमाचा लाभ केवळ दिव्यांग बांधवांपुरता मर्यादित न ठेवता ज्येष्ठ नागरिकांसाठीही सहाय्यभूत साहित्याचे वितरण करण्यात आले. त्यामुळे समाजातील गरजू आणि आधाराची आवश्यकता असलेल्या घटकांना मदतीचा हात मिळाला.
आमदार अतुल भोसले यांनी माध्यमाशी बोलताना सांगितले की 921 दिव्यांग बांधवांना साहित्य वाटप करण्यात आले असून या साहित्याची एकूण किंमत सुमारे 80 लाख रुपये आहे. योजनेच्या माध्यमातून मिळालेल्या या सहाय्यामुळे लाभार्थ्यांच्या दैनंदिन जीवनात काही प्रमाणात सुलभता निर्माण होणार आहे.पंतप्रधान नरेंद्र मोदी यांच्या वाढदिवसानिमित्त विविध सामाजिक उपक्रम राबविण्यात येत आहेत. कराड दक्षिण मतदारसंघात केंद्र सरकारच्या माध्यमातून दिव्यांग बांधवांसाठी सुमारे 80 लाख रुपयांचे उपयोगी साहित्य वितरित करण्यात आले आहे. दिव्यांग बांधवांना याचा निश्चितच लाभ होईल. दिव्यांगांसोबतच ज्येष्ठ नागरिकांसाठीही हा उपक्रम राबविण्यात आला आहे.
No comments:
Post a Comment