कराड नगरपरिषदेच्या प्रभाग क्रमांक ७ मधील नवनिर्वाचित अपक्ष नगरसेविका सौ तेजश्री सुदर्शन पाटसकर यांच्या पुढाकारातून ‘नगरसेवक आपल्या दारी’ या उपक्रमाला सुरुवात करण्यात आली आहे. नागरिकांच्या थेट भेटी घेऊन त्यांच्या समस्या, सूचना आणि अपेक्षा जाणून घेण्याबरोबरच शासनाच्या विविध योजना पात्र लाभार्थ्यांपर्यंत पोहोचविण्याचा या उपक्रमाचा मुख्य उद्देश असल्याची माहिती त्यांनी आज आयोजित पत्रकार परिषदेत दिली.
पाणीपुरवठा, रस्ते, स्वच्छता आणि आरोग्य यांसारख्या मूलभूत सुविधांशी संबंधित प्रश्नांवर या उपक्रमाद्वारे विशेष लक्ष केंद्रित करण्यात येणार आहे. तसेच आयुष्मान कार्ड, महिला व ज्येष्ठ नागरिकांसाठीच्या योजना, स्वयंरोजगाराच्या संधी आणि युवकांसाठी कौशल्य विकास कार्यक्रमांबाबतही नागरिकांना मार्गदर्शन करण्यात येणार आहे.
‘एक घर, एक योजना आणि प्रत्येक कुटुंब शासनाशी जोडले गेले पाहिजे’ या संकल्पनेतून हा उपक्रम राबविण्यात येत असल्याचे तेजश्री पाटसकर यांनी सांगितले.
सोमवार पेठ, मंगळवार पेठ, गुरुवार पेठ यांसह कराड नगरपरिषद हद्दीतील विविध भागांमध्ये जाऊन नागरिकांशी थेट संवाद साधला जाणार असल्याचे त्यांनी स्पष्ट केले.
नागरिकांच्या समस्या प्रशासनापर्यंत पोहोचवून प्रभागाचा सर्वांगीण विकास साधण्याचा तसेच शासनाच्या योजनांचा लाभ प्रत्येक पात्र कुटुंबापर्यंत पोहोचविण्याचा प्रयत्न केला जाणार असल्याचे भाजप युवा मोर्चाचे नेते सुदर्शन पाटसकर यांनी यावेळी सांगितले.
No comments:
Post a Comment