वेध माझा ऑनलाइन।
महाराष्ट्र सरकारची महत्त्वाकांक्षी आणि गेमचेंजर ठरलेली ‘मुख्यमंत्री माझी लाडकी बहीण’ योजना पुन्हा एकदा चर्चेत आली आहे. या योजनेअंतर्गत पात्र महिलांना दर महिन्याला १,५०० रुपये आर्थिक मदत दिली जाते. रक्षाबंधनाच्या पार्श्वभूमीवर जुलै आणि ऑगस्ट या दोन महिन्यांचे हप्ते एकत्रितपणे देऊन महिलांच्या खात्यावर ३ हजार रुपये जमा केले जाणार असल्याची चर्चा सुरू झाली आहे. मात्र, ३ हजार रुपये देण्याबाबत अद्याप कोणतीही अधिकृत घोषणा झालेली नाही.
२०२४ मध्ये रक्षाबंधनाच्या पार्श्वभूमीवर लाभार्थी महिलांना दोन महिन्यांचे हप्ते एकत्रित देण्यात आले होते. त्यामुळे यंदाही जुलै आणि ऑगस्टचे हप्ते एकत्र मिळण्याची शक्यता व्यक्त केली जात आहे. मात्र, अंतिम निर्णय शासनाकडून अधिकृतपणे जाहीर झाल्यानंतरच याबाबत स्पष्टता येणार आहे.
दरम्यान, जुलै महिन्याचा हप्ता वितरित करण्यासाठी महायुती सरकारने महत्त्वाचा निर्णय घेतला आहे. सामाजिक न्याय विभागाच्या तरतुदीतून तब्बल ३४४.७४ कोटी रुपये महिला व बालकल्याण विभागाकडे वळवण्यात आले आहेत. या निधीचा वापर ‘मुख्यमंत्री माझी लाडकी बहीण’ योजनेतील लाभार्थी महिलांना जुलै महिन्याचा हप्ता देण्यासाठी करण्यात येणार आहे. निधी वर्ग करण्यासंदर्भातील शासन निर्णयही जारी करण्यात आला आहे.
लाडकी बहीण योजना सुरू झाल्यापासून या योजनेसाठी सामाजिक न्याय विभाग तसेच आदिवासी विकास विभागातील निधी वळवण्यात येत असल्याचे समोर आले आहे. या निधी वळवण्याचा परिणाम संबंधित विभागांच्या इतर योजनांवर होत असल्याची चर्चा आहे.
यापूर्वीही लाडकी बहीण योजनेसाठी विविध विभागांमधून निधी वळवण्यात आला आहे. फेब्रुवारी २०२६ मध्ये जानेवारीच्या हप्त्यासाठी ९८.४५ कोटी रुपये, तर जून २०२५ मध्ये एप्रिल आणि मे महिन्याच्या मानधनासाठी ४१० कोटी रुपये वळवण्यात आल्याची माहिती समोर आली होती.
आता जुलै महिन्याचा हप्ता देण्यासाठी ३४४.७४ कोटी रुपयांचा निधी उपलब्ध करून देण्यात आल्याने लाभार्थी महिलांचे लक्ष हप्ता कधी जमा होणार याकडे लागले आहे. त्यातच रक्षाबंधनाच्या पार्श्वभूमीवर दोन महिन्यांचे हप्ते एकत्र देऊन ३ हजार रुपये मिळणार असल्याची चर्चा असल्याने महिलांमध्ये उत्सुकता वाढली आहे. मात्र, ३ हजार रुपयांच्या हप्त्याबाबत अधिकृत निर्णय होईपर्यंत केवळ चर्चेवर विश्वास न ठेवण्याचे आवाहन करण्यात येत आहे.
No comments:
Post a Comment