वेध माझा ऑनलाइन - सूर्याच्या पृष्ठभागावर कायम मोठे मोठे स्फोट होत असतात. परिणामी सूर्यातून मोठ्या प्रमाणात रेडिएशन बाहेर फेकली जातात, ज्याचा संपूर्ण सूर्यमालेवर प्रभाव पडतो. या रेडिएशनमुळे येणाऱ्या वादळाला सौरवादळ किंवा जिओमॅग्नेटिक स्टॉर्म म्हणूनही ओळखलं जातं. यामुळे भरपूर उष्णता वाढते, तसेच इलेक्ट्रोमॅग्नेटिक रेडिएशनमध्येही मोठ्या प्रमाणात वाढ होते. वैज्ञानिकांनी दिलेल्या माहितीनुसार, असंच एक सौरवादळ आज (19 जुलै) पृथ्वीला धडकणार आहे. TV9 हिंदीने याबाबतचं वृत्त प्रसिद्ध केलं आहे.
अंतराळ हवामान अभ्यासक आणि फिजिसिस्ट डॉ. तमिथा स्कोव यांनी याबाबत माहिती दिली आहे. आपल्या ट्विटर हँडलवरून त्यांनी सांगितलं आहे, की लवकरच ‘लांब सापासारख्या सोलर फ्लेअर्स पृथ्वीला धडकतील’. नासानेदेखील यापूर्वीच 19 जुलैला हे सौरवादळ पृथ्वीला धडकू शकतं असा अंदाज वर्तवला होता. याचा परिणाम सॅटेलाईट, वीज, जीपीएस, रेडिओ, मोबाईल नेटवर्क अशा विविध गोष्टींवर होऊ शकतो.
या गोष्टींवर होणार परिणाम
सौरवादळामुळे पृथ्वीवरील उंच भागातील वीज जाण्याचा धोका (Blackout) वर्तवण्यात येत आहे. सोबतच, रेडिओ सिग्नलवरही (Radio signal) याचा परिणाम होईल. पृथ्वीच्या वातावरणातील सगळ्यात वरच्या थरात असलेल्या कृत्रिम उपग्रहांना याचा सर्वाधिक फटका बसू शकतो. तसेच, जीपीएस (GPS) आणि मोबाईल सिग्नलवरही (Mobile Signal) याचा परिणाम होण्याची शक्यता वर्तवण्यात येत आहे. यामुळे पृथ्वीवर ठिकठिकाणी ब्लॅकआऊट होऊन, बऱ्याच क्षेत्रांचा संपर्क तुटू शकतो. त्यामुळे सावधगिरी बाळगण्याचा इशारा वैज्ञानिकांनी दिला आहे.
No comments:
Post a Comment