आयसीएससी बोर्डाचा दहावीचा निकाल जाहीर ; पुण्याच्या मुलीने पटकावला देशात पहिला क्रमांक...वाचा बातमी...

वेध माझा ऑनलाइन - राज्य बोर्ड असो की दिल्ली बोर्ड प्रत्येक निकालावर मुलींची छाप दिसत आहे. नुकताच आयसीएससी बोर्डाचा दहावीचा निकाल जाहीर झाला आहे. यामध्ये पुण्यातील एका मुलीने देशात पहिला क्रमांक पटकावला आहे. हरगुण कौर माथरू असं या मुलीचं नाव असून तिला दहावीत 99.80 टक्के प्राप्त झाले आहेत. आयसीएसई दहावीचा एकूण निकाल 99.97 टक्के इतका लागला आहे. तर, आयसीएसई दहावी बोर्ड परीक्षेत महाराष्ट्राचा निकाल 100 टक्के लागला आहे. ही अत्यंत कौतुकास्पद बाब आहे.

यंदाही दहावीच्या निकालात मुलींनी बाजी मारली आहे. 99.98 टक्के मुली उत्तीर्ण झाल्या आहेत. तर 99.97 टक्के मुलं उत्तीर्ण झाले आहेत. पुण्याची हरगुण कौर माथरू ही देशात पहिली आली आहे. ती पुण्यातील सेंट मेरिज शाळेची विद्यार्थिनी आहे. तर मुंबईच्या जुहू येथील जमनाबाई नरसी स्कूलची अमोलिका मुखर्जी ही 99.60 टक्के गुण मिळवून देशात दुसरी आली आहे. या परीक्षेत पहिल्या तीन क्रमांकावर असलेल्या विद्यार्थ्यांची संख्या 39 इतकी आहे. पुण्यातील हरगुण कौर माथरू, कानपूरमधील अनिका गुप्ता, लखनऊ येथून कनिष्क मित्तल, बलरामपूरचा पुष्कर त्रिपाठी या चारही विद्यार्थ्यांना 99.80 टक्के गुण प्राप्त झाले असून चारही विद्यार्थ्यांनी देशात पहिला येण्याचा मान पटकावला आहे.