विधान परिषदेच्या सातारा-सांगली स्थानिक स्वराज्य संस्थेच्या निवडणुकीत राष्ट्रवादी काँग्रेसचे नेते जयंत पाटील यांचा गट फुटणार !

वेध माझा ऑनलाइन।

विधान परिषदेच्या सातारा-सांगली स्थानिक स्वराज्य संस्थेच्या निवडणुकीत राष्ट्रवादी काँग्रेस शरद पवार पक्षाचे नेते जयंत पाटील यांचा गट फुटणार, असा खळबळजनक दावा भाजपाचे आमदार गोपीचंद पडळकर यांनी केला. दिवा विझताना जसा मोठा होतो, तशीच जयंत पाटील यांची अवस्था झाली आहे, अशी टीकाही त्यांनी केली. सांगली जिल्हा बँकेच्या विविध विषयावरून आमदार पडळकर यांनी पत्रकार परिषद घेतली. त्यावेळी ते बोलत होते. 

सांगली महानगरपालिकेतील राष्ट्रवादी काँग्रेस शरद पवार गटाचे दोन नगरसेवक भाजपामध्ये आलेत. यापुढेही अनेक गट जयंत पाटील यांची साथ सोडतील, असे पडळकर म्हणाले. कर्नाटकातील एका कारखान्याचे महाराष्ट्रात ऑफिस दाखवून त्यांना कर्ज देता, खासदार विशाल पाटील यांना कर्ज का देण्यात आले? पूर्वी थकीत असताना २७० कोटी कर्ज कसे देता? हे सारे प्रकार चौकशीत उघड होणार असल्यामुळे पळवाट शोधायला ते न्यायालयात गेले आहेत. जयंत पाटील यांचा पावडर लावलेला चेहरा उघडा पडणार आहे. रामाच्या मंदिरात हा रावण राहतो, हे लोकांच्या लक्षात येईल, अशी टीका पडळकर यांनी केली.