गेल्या दोन वर्षात नव्याने सुरु केलेल्या नवीन ठिकाणच्या कराड अर्बन बँकेच्या शाखेतून बँकेने .४५० कोटींचा अतिरिक्त व्यवसाय मिळवला - ,चेअरमन समीर जोशी यांची माहिती ;

वेध माझा ऑनलाइन।

दि कराड अर्बन को-ऑपरेटिव्ह बँक लिमिटेड, कराड (शेड्यूल्ड बँक) या अग्रगण्य बँकेच्या संपूर्ण महाराष्ट्र कार्यक्षेत्रात वाढ करण्याच्या महत्त्वपूर्ण पोटनियम दुरुस्तीला रिझर्व्ह बँक ऑफ इंडिया आणि सहकार विभागाने मान्यता दिली आहे. सध्या बँकेचे कार्यक्षेत्र आठ जिल्ह्यात ७२ शाखाद्वारे पसरले असून आता संपूर्ण महाराष्ट्रात बँकेला शाखा विस्तार करून महाराष्ट्रातील अनेक शहरात ग्राहक सेवेच्या नवीन संधी उपलब्ध झाल्या आहेत. यामुळे बँकेच्या व्यवसाय वाढीला मोठी चालना मिळणार असून, गेल्या दोन वर्षात नव्याने सुरु केलेल्या नवीन ठिकाणच्या शाखेतून बँकेने रु.४५० कोटींचा अतिरिक्त व्यवसाय मिळवला असल्याची माहिती बँकेचे अध्यक्ष समीर जोशी यांनी दिली.

बँकेने डिजीटल चॅनेलच्या माध्यमातून सर्वसामान्यांना अत्यावश्यक अशा यू.पी.आय. सारख्या सेवा दिल्या असून बँकेच्या व्यवसाय वाढीसाठी डिजीटल माध्यमांचा वापर पर्याप्त प्रमाणात करण्याच्या दृष्टीने व्यवस्थापनाने निर्णय घेतले असून त्याची अंमलबजावणी सुरू आहे. त्यामुळे ग्राहकांना डिजीटल प्लॅटफॉर्मवरील सर्व सेवासुविधा एकत्र मिळणार आहेत, असे प्रतिपादन बँकेचे उपाध्यक्ष शशांक पालकर यांनी केले.

गेल्या शंभर वर्षांहून अधिक वाटचालीत कराड अर्बन बँकेने प्रगतीची परंपरा कायम राखत व्यवसायामध्ये गत संपलेल्या आर्थिक वर्षात रु.७५० कोटी वाढीचा विक्रम साध्य केला आहे. तसेच वसुलीच्या आघाडीवर देखील नक्त एन.पी.ए.चे प्रमाण सलग तीन वर्षे 'शून्य' टक्के राखण्यात यश मिळविले आहे. मार्च २०२६ अखेर बँकेने व्यवसायाचा रु.६५०० कोटींचा टप्पा ओलांडला आहे. शून्य टक्के एनपीए कायम राखणे, व्यवसाय वाढीत सातत्य ठेवणे व बँकेचा महाराष्ट्रभर विस्तार करून बँकेचा नावलौकिक वाढविणे, हेच मुख्य ध्येय ठेवून बँकेने चालू आर्थिक वर्षात आपली वाटचाल सुनिश्चित केली आहे, अशी माहिती बँकेचे माजी अध्यक्ष डॉ. सुभाषराव एरम यांनी दिली.

युध्दाच्या पार्श्वभूमीमुळे पेट्रोल व डिझेल मध्ये झालेली वाढ आणि राष्ट्रीय हित लक्षात घेता, बँकेने विद्युत गाड्या घेणाऱ्या ग्राहकांसाठी तत्काळ कर्ज पुरवठ्यासाठी कमी व्याजदराची कर्ज योजना तयार केली आहे. याअंतर्गत दुचाकी वाहनांसाठी ७.७५ टक्के तर चार चाकी वाहनांसाठी ८.२५ टक्के व्याज दराने कर्जपुरवठा केला जाणार असून हा सवलतीचा व्याजदर फक्त बॅटरीवर चालणाऱ्या गाड्यांसाठी मिळणार आहे. नव्या कर्ज योजनेचा लाभ घेऊन ग्राहकांनी राष्ट्रीय हित जोपासण्यात आपला सहभाग नोंदवावा, असे आवाहन मुख्य कार्यकारी अधिकारी सीए. धनंजय शिंगटे यांनी केले.