गणेशोत्सवाच्या निमित्ताने कराड शहरातील नवजवान गणेश मंडळ, आझाद चौक यांच्यावतीने साकारण्यात आलेल्या ‘नरसिंह अवतार’ या जिवंत देखाव्याला भाविकांचा उत्स्फूर्त प्रतिसाद मिळत असून, दर्शनासाठी रेकॉर्डब्रेक गर्दी होत आहे. लहानांपासून ज्येष्ठांपर्यंत नागरिक मोठ्या संख्येने या देखाव्याला भेट देत आहेत.
भगवान विष्णूंचा चौथा अवतार मानल्या जाणाऱ्या नरसिंह अवताराची कथा आणि भक्त प्रल्हादाची अढळ श्रद्धा या देखाव्यात प्रभावीपणे सादर करण्यात आली आहे. भक्ती, श्रद्धा आणि सत्याच्या मार्गावर चालणाऱ्याचा अखेर विजय होतो, असा आध्यात्मिक संदेश या जिवंत देखाव्यातून देण्यात आला आहे.
विशेष म्हणजे केवळ धार्मिक कथानक सादर करण्यापुरता हा देखावा मर्यादित न राहता सत्य, श्रद्धा, संस्कार आणि वाईट प्रवृत्तींवर चांगुलपणाचा विजय हा सामाजिक संदेशही देत आहे. त्यामुळे हा देखावा भाविकांसह युवक आणि बालकांच्या आकर्षणाचा केंद्रबिंदू ठरत आहे.
देखाव्याची मांडणी, पात्रांचा अभिनय, प्रकाशयोजना आणि प्रसंगाचे सादरीकरण यामुळे प्रत्यक्ष नरसिंह अवतार आपल्या डोळ्यांसमोर साकारल्याचा अनुभव भाविकांना मिळत आहे. त्यामुळे दररोज आझाद चौक परिसरात नागरिकांची मोठी गर्दी होत असून, गणेशोत्सवाच्या उत्साहात या देखाव्याने विशेष रंग भरला आहे.
परंपरा, भक्ती आणि सामाजिक संदेश यांचा सुंदर संगम साधणाऱ्या नवजवान गणेश मंडळाच्या या उपक्रमाचे कराडकरांकडून कौतुक होत आहे.
No comments:
Post a Comment