वेध माझा ऑनलाइन - एकाच पक्षात असूनही सातारच्या खा उदयनराजे आणि आ शिवेंद्रसिंहराजे यांच्यामधून विस्तवही जात नाही. संधी मिळताच दोन्ही नेते एकमेकांना टोला लगावल्या शिवाय राहत नाहीत. साताऱ्यातील राजकीय वर्चस्वावरून या दोन्ही नेत्यांमध्ये कायम टशन असते. आता तर नगरपालिकेची निवडणूक जवळ आल्याने हे दोन्ही नेते एकमेकांवर सडकून टीका करताना दिसत आहेत. थोडी जरी संधी मिळाली तरी हे दोन्ही नेते एकमेकांवर पलटवार करतात. आज व्हॅलेंटाईन डे आहे. या दिवसाचं निमित्त साधूनही या नेत्यांची एकमेकांवर टोलेबाजी सुरू आहे. माझ्याकडे उदयनराजेंचा नंबर नाही. त्यांच्या ड्रायव्हरच्या नंबरहून ते मला फोन करतात. त्यांना प्रेमाचा संदेश पाठवायचा असेल तर त्यांच्या ड्रायव्हरलाच आय लव्ह यूचा मेसेज पाठवावा लागेल, असं शिवेंद्रसिंहराजे भोसले म्हणत उदयनराजेंना टोला लगावला आहे.
शिवेंद्रसिंहराजे भोसले यांनी आज पत्रकार परिषद घेतली. यावेळी त्यांनी पत्रकारांशी मनमोकळ्या गप्पा मारल्या. आज व्हॅलेंटाईन डे असल्याने तुम्ही उदयनराजेंना शुभेच्छा पाठवल्या का? असा सवाल त्यांना करण्यात आला. त्यावर त्यांनी कोटी केली. माझ्याकडे त्यांचा नंबर नाही. मला ते नेहमी त्यांच्या ड्रायव्हरच्या फोनवरून फोन करतात. माझ्याकडे त्यांच्या ड्रायव्हरचाही नंबर सेव्ह नाही. त्यामुळे शुभेच्छा दिल्या नाहीत. शुभेच्छा द्यायच्याच झाल्या तर मला त्यांच्या ड्रायव्हरलाच आय लव्ह यूचा मेसेज पाठवावा लागेल. मग तो मला कळवेल, अशी मिष्किल टिप्पणी शिवेंद्रराजे यांनी केली. त्यामुळे एकच खसखस पिकली.
यावेळी त्यांनी इनोव्हेटिव्ह सातारा या योजनेवरही टीका केली. त्यांचं पाच वर्षातील काम सातारकरांनी पाहिलं आहे. सातारा विकास आघाडीबाबत भयंकर नाराजी आहे. विरोधकांनी आरोप करायच्या ऐवजी यांचेच नगरसेवक यांच्या पदाधिकाऱ्यांवर आरोप करत आहेत. कुणी किती पैसे खाल्ले, घंटागाडीवाल्यांकडून काय घेतलं? कचरा डेपोत कोणी डल्ला मारला? हे आरोप त्यांच्यातच सुरू आहेत. त्यामुळे शेवटच्या टप्प्यात इनोव्हेटिव्ह सातारा, अमूक सातारा तमूक सातारा सुरू आहे, असा टोला त्यांनी लगावला.
No comments:
Post a Comment