कराडच्या गणेश पवारने बनवले एका क्लिक वर घरपोच सामान पोचवणारे अँप ; गणेशचे शहरातून होतय कौतुक...

अजिंक्य गोवेकर
कऱ्हाड
 कोरोनाचा हॉटस्पॉट बनलेल्या कऱ्हाड शहरात शासनाकडून किराणा माल नागरिकापर्यंत पोचविण्याचे प्रयत्न सुरू आहेत. मात्र, ती यंत्रणा कार्यान्वित होण्यास विलंब होत आहे. अशा स्थितीत कऱ्हाडच्या गणेश प्रल्हाद पवार या युवकाने किराणासह भाजीपाला घरपोच करण्याचे ऍप डेव्हलप केले आहे. त्याला प्रांताधिकारी उत्तम दिघे यांनीही मान्यता दिली आहे.त्या ऍपव्दारे सामान्यांनी त्यांना हवे असणाऱ्या साहित्याची मागणी मोबाईलव्दारे त्या ऍपवर नोंदवल्यास त्यांना त्या वस्तू घरपोच मिळणार आहेत. त्याच्या ऍपव्दारे किराणा, भाजीपाला घरपोचला नागरिकांनी पसंती दिली आहे.
 गणेश पवारला चेन्नईतील सर्व्हे हर्ट कंपनीने तयार केलेले ऍप नेटवर आढळले. त्याने ते डाउनलोड करून घेतले. त्यात सुधारणा केल्या. त्यानंतर ते ऍप प्रॉपर रन होण्यास तयार झाले. त्याची पहिली चाचणी त्यांनी प्रभाग क्रमांक सातमध्ये घेतली. ती चाचणी यशस्वी झाली.

शासनाची मंजुरी मिळाल्यानंतर त्या ऍपवर आता शहरातील प्रत्येक प्रभागातील दुकानदारांची यादी प्रभानिहाय अपलोड केली आहे. त्यात 66 दुकानदार आहेत. त्याशिवाय भाजीपाला पोच करणाऱ्या शेतकऱ्यांची नावे जोडली आहे. त्याव्दारे सेवा सुरू आहे. साहित्य पोच करण्याचे कोणतेही चार्जेस लावले जात नाहीत.घरपोच किराणा, भाजीपाला हवा असल्यास गणेश पवारने तयार केलेल्या ऍपचा वापर करता येतो. त्यासाठी त्या ऍपवर गेल्यास नाव, मोबाईल क्रमांक, पत्ता, प्रभाग क्रमांक, त्या प्रभाग क्रमांकातील तुमच्या जवळील किराणा दुकानदाराचे नाव अशी माहिती प्रथम त्या ऍपवर भरायची आहे. त्यानंतर तुम्हाला हव्या असलेल्या जिन्नसांची यादी त्यात भरायची, त्यानंतर ती सगळी माहिती ऍपवर सबमिट करायची. ती माहिती त्या ऍपव्दारे श्री. पवार यांना मिळते. पवार ती माहिती त्या दुकानदारांपर्यंत व्हॉट्‌सऍपवर पोचवतात. त्यानंतर ते साहित्य संबंधित नागरिकांपर्यंत पोचवले जाते.