वेध माझा ऑनलाइन।
मध्य पूर्वेत सुरू असलेल्या तणावपूर्ण परिस्थितीमुळे जगभरात तेलाच्या किमती वाढल्या आहेत. मात्र या परिस्थितीतही तेलाच्या दरांबाबत मोठा दावा करण्यात आला आहे. अमेरिकेचे अध्यक्ष डोनाल्ड ट्रम्प यांनी सांगितले की, सध्या वाढलेले तेलाचे दर लवकरच कमी होतील आणि बाजारात पुन्हा स्थिरता येऊ शकते.
अमेरिका आणि इराण यांच्यातील संघर्ष अधिक तीव्र होत असल्याचे दिसत आहे. अमेरिकन लष्कराने इराणी नौदलावर लक्ष्य साधत मोठी कारवाई केली असून काही युद्धनौका बुडवल्याचा दावा करण्यात आला आहे. या कारवाईला ट्रम्प यांनी केवळ मर्यादित पाऊल असल्याचे सांगितले. त्याच वेळी अमेरिकन सैन्य आणि इस्रायली हवाई दल तेहरान परिसरातील महत्त्वाच्या ठिकाणांवर बॉम्बहल्ले करत असल्याचेही त्यांनी नमूद केले.
दुसरीकडे इराणकडूनही प्रत्युत्तर दिले जात असून अमेरिकेच्या आखाती देशांमधील लष्करी तळांवर हल्ले करण्यात आल्याची माहिती समोर आली आहे. तसेच सौदी अरेबिया येथील तेल रिफायनरीवर झालेल्या हल्ल्यामुळे मोठे नुकसान झाल्याचे सांगितले जाते. या संघर्षात दुबई विमानतळालाही लक्ष्य करण्यात आले असून इराणकडून तेथेही हल्ला झाल्याची माहिती समोर आली आहे. त्यामुळे या युद्धाचा प्रभाव संपूर्ण प्रदेशात जाणवत आहे.
या घडामोडींमध्ये ट्रम्प यांनी तेलाच्या किमतींबाबत महत्त्वाचे वक्तव्य केले. त्यांनी सांगितले की युद्ध सुरू होण्यापूर्वीच तेलाच्या दरांमध्ये वाढ होईल असा अंदाज होता आणि तो खरा ठरला. मात्र ज्या वेगाने दर वाढले आहेत, त्याच वेगाने ते खाली येण्याची शक्यता देखील आहे. त्यामुळे भविष्यात तेल बाजारात मोठा बदल दिसू शकतो, असे त्यांनी सूचित केले
यावेळी त्यांनी हमास हल्ल्याचाही उल्लेख केला आणि ७ ऑक्टोबर २०२३ ची घटना विसरू नये असे म्हटले. ट्रम्प यांच्या मते इराणी राजवटीविरोधातील कारवाई केवळ अमेरिकेसाठी किंवा इस्रायल साठी नाही, तर संपूर्ण जगाच्या सुरक्षिततेसाठी केली जात आहे. सध्या सुरू असलेल्या युद्धामुळे तेलाचे दर प्रचंड वाढले असून त्याचा परिणाम जगभरातील महागाईवर होत आहे. अनेक देशांना इंधन आणि गॅसच्या टंचाईसारख्या समस्यांचा सामना करावा लागत असल्याचेही स्पष्ट झाले आहे
No comments:
Post a Comment