मास्क, टोपी घालून वेश बदलून दिल्लीला जायचो : दिल्लीत पत्रकारांशी अनौपचारिक गप्पा मारताना अजित पवारांनी केला गौप्यस्फोट ; राष्ट्रवादी काँग्रेस महायुतीमध्ये कशी सहभागी झाली? याबद्दलचे केले खुलासे ; काय आहे बातमी?

वेध माझा ऑनलाइन : शिवसेनेपाठोपाठ राष्ट्रवादी काँग्रेसमध्ये उभी फूट पडली आणि महाराष्ट्र पुन्हा एकदा राजकीय भूकंपानं हादरलं. गेल्या दोन वर्षांत राज्यातील जनतेनं अनेक राजकीय भूकंप अनुभवले आहेत. पण राष्ट्रवादीतील या फुटीचं कट-कारस्थान नेमकं कसं रचलं गेलं? कुणालाच कसा सुगावा लागला नाही? असे अनेक प्रश्न लोकांच्या मनात आहेत. याच प्रश्नांची उत्तरं आता खुद्द शरद पवारांची साथ सोडून गेलेल्या उपमुख्यमंत्री अजित पवार यांनी सांगितलं आहे. वेगळा निर्णय घेण्याच्या तयारीत असताना, मास्क आणि टोपी घालून वेश बदलून दिल्लीला जायचो, असा खळबळजनक गौप्यस्फोट उपमुख्यमंत्री अजित पवार यांनी केला आहे. 

थोरल्या पवारांची साथ सोडून भाजपसोबत सत्तेत सहभागी झालेल्या उपमुख्यमंत्री अजित पवार यांनी स्वतःच्या महायुतीतील सहभागाबाबतचा किस्सा सांगितला आहे. दिल्लीत पत्रकारांसोबत उपमुख्यमंत्री आणि राष्ट्रवादी काँग्रेस (अजित पवार गट) चे अध्यक्ष अजित पवार यांचा गप्पांचा फड रंगला होता. पत्रकारांशी अनौपचारिक गप्पा मारताना अजित पवारांनी महायुतीसोबत जाण्यापूर्वी काय-काय आणि कसं-कसं जुळवून आणलं? याबाबत अनेक खळबळजनक खुलासे केले. 

मास्क आणि टोपी घालून वेश बदलून दिल्लीला जायचो, असा गौप्यस्फोट उपमुख्यमंत्री अजित पवारांनी केला आहे. दिल्लीत पत्रकारांशी त्यांनी अनौपचारिक गप्पा मारल्या. त्यावेळी त्यांनी राष्ट्रवादी काँग्रेस महायुतीमध्ये कशी सहभागी झाली? याबद्दलचे खुलासे केले. महायुतीत सहभागी होण्यापूर्वी केंद्रीय गृहमंत्री अमित शाह यांच्याशी दहा वेळा बैठका झाल्या होत्या, असंही अजित पवार यांनी सांगितलं.