कराडातील अलबिक्स हॉटेलचे अतिक्रमण पालिकेने हटवले ; पोलीस बंदोबस्तात केली कारवाई ;

वेध माझा ऑनलाईन। । कराड शहरात मोठ्या प्रमाणात अतिक्रमणात वाढ झाली कि त्यांवर पालिकेच्या वतीने वेळोवेळी कारवाई केली जाते. कारवाई अगोदर नोटीस देखील दिली जाते. अशी कारवाई आज कराड पालिकेकडून अजंठा ट्रान्सपोर्ट समोरील अलबिक्स हॉटेलवर करण्यात आली. यावेळी जेसीबी, ट्रॅक्टरच्या सहाय्याने पोलीस बंदोबस्तात पालिकेच्या २५ कर्मचाऱ्यांनी अनधिकृत अतिक्रमण हटवले.  

कराड येथील पोपटभाई पेट्रोल पंप ते शहर पोलीस ठाणे मार्गावर असलेल्या अजंठा ट्रान्सपोर्ट समोर तमन्ना इरफान सय्यद यांनी अलबिक्स हॉटेल उभारले होते. मात्र, ते अतिक्रमणात येत असल्याने कराड पालिकेकडून तमन्ना सय्यद यांना सहा महिने अगोदर अतिक्रमण काढून घेण्याची नोटीस देण्यात आली. तसेच अतिक्रमण स्वतःहून काढून घेण्याच्या सूचना देण्यात आल्या होत्या. मात्र, संबंधितांनी हॉटेलचे अतिक्रमण न हटवल्यामुळे आज मंगळवारी सायंकाळी ५ वाजण्याच्या सुमारास पालिकेचे मुख्याधिकारी सहकार खंदारे यांच्या मार्गदर्शनाखाली नगररचनाकार अधिकार व २५ स्वच्छता विभागाच्या कर्मचाऱ्यांनी अतिक्रमण हटवले.

यावेळी कोणताही अनुचित प्रकार घडू नये यासाठी मोठ्या प्रमाणात पोलीस बंदोबस्त तैनात करण्यात आला होता. यावेळी हॉटेलचे अनधिकृतपणे बांधलेले शेड, पत्रा, पाठीमागील सिमेंट तसेच विटा यांच्या सहाय्याने केलेले बांधकाम जेसीबीच्या साह्याने हटवण्यात आले.

यावेळी पालिकेच्या सहाय्यक नगररचनाकार अंकिता पवार, नोडल अधिकारी आर. डी. भालदार, मारुती काटरे, दिनकर गायकवाड, सुरेश शिंदे आदींसह 25 आरोग्य विभागाचे कर्मचारी यांची उपस्थिती होती.