दुय्यम निबंधक कार्यालयात तंदूर बिर्याणी पार्टीचा बेत ; जिल्हाधिकाऱ्यांकडे तक्रार दाखल...

वेध माझा ऑनलाइन -सातारच्या  दुय्यम निबंधक कार्यालयात चक्क तंदूर बिर्याणी पार्टीचा बेत काल (बुधवारी) आखला गेल्याने तेथील अधिकारी व कर्मचाऱ्यांना कामालाही वेळ मिळाला नसल्याचे निदर्शनास आले त्यामुळे जागरूक नागरिकांनी जिल्हाधिकाऱ्यांकडे याबाबतची तक्रार केली आहे

सातारा येथील सहाय्यक दुय्यम निबंधक कार्यालय क्रमांक एक च्या कार्यालयात बुधवारी दुपारी सर्व कर्मचारी आणि अधिकारी चक्क तंदूर बिर्याणीचा आस्वाद घेत असल्याचे लक्ष्यात आले याबरोबरच टीव्हीवर क्रिकेट मॅच बघण्यात मग्न झालेल्या या कर्मचाऱ्यांनी बाहेर कामासाठी आलेल्या पक्षकारांची मात्र वाट पहायला लावून-लावून विकेटच पाडली..

सातारा तहसील कार्यालयाच्या आवारातच सहाय्यक दुय्यम निबंधक कार्यालय आहे तालुक्यातील समाविष्ट गावांमधील जमीन खरेदी विक्रीचे दस्त या ठिकाणी होत असल्यामुळे नेहमीच गर्दी असते मात्र दुपारच्या सुमारास कार्यालयातच बिर्याणीचा भरलेला टोप आणि त्यासोबत तंदुरी चिकन आणण्यात आले मग काय उपस्थित अधिकारी कर्मचाऱ्यांनी काम बाजूला सारले बाह्या मागे सारल्या आणि कार्यालयातील टेबलवरच तंदूर बिर्याणीवर ताव मारायला सुरुवात केली याबरोबरच सोबतीला क्रिकेट मॅच पाहण्याचेही काम सुरू होतेच... याचवेळी कामासाठी आलेले पक्षकार ही पार्टी कधी संपेल याची वाट पाहत तात्काळत उभे होते मात्र कोणत्याही अधिकाऱ्याला याच सोयरे सुतक नव्हतं याबाबत विचारणा करणाऱ्या पत्रकारांनाही संबंधित अधिकाऱ्यांनी उद्धट उत्तरे दिली याची तक्रार जिल्हाधिकारी यांच्याकडे करण्यात आली या घटनेने चांगलीच खळबळ उडाली असून या कार्यालयात नेमकं चाललय काय ही तंदूर बिर्याणी कोणत्या पक्षकाराने दिली कोणत्या कारणाने दिली.. याची चौकशी जिल्हाधिकाऱ्यांकडून होणार का असे अनेक प्रश्न उपस्थित झाले आहेत या तंदूर बिर्याणी मेजवानीची खुमासदार चर्चा दिवसभर तहसील कार्यालय परिसरात सुरू होती