कृष्णा बँकेला १५ कोटी ४ लाख रूपयांचा ढोबळ नफा; चेअरमन डॉ. अतुलबाबा भोसले : ७३९ कोटींचा एकूण व्यवसाय

वेध माझा ऑनलाइन -  ग्रामीण भागातील शेतकऱ्यांची हक्काची बँक समजल्या जाणाऱ्या कृष्णा सहकारी बँकेला ३१ मार्च २०२२ अखेर संपलेल्या आर्थिक वर्षात १५ कोटी ४ लाख रूपये इतका ढोबळ नफा प्राप्त झाला आहे. बँकेने या आर्थिक वर्षात ७३९ कोटी रूपयांचा व्यवसाय टप्पा पूर्ण केला असून, बँकेने पुढील वर्षाअखेर १००० कोटी रूपयांचे व्यवसाय उद्दिष्ट निश्चित केले असल्याची माहिती बँकेचे चेअरमन डॉ. अतुलबाबा भोसले यांनी दिली आहे.

याबाबत प्रसिद्धीस देण्यात आलेल्या पत्रकात म्हटले आहे, की सर्वसामान्य शेतकरी, कष्टकरी यांना केंद्रबिंदू मानून लोकांना बचतीची सवय लागावी व गरजेनुसार कर्ज घेता यावे यासाठी सहकारमहर्षी जयवंतराव भोसले (आप्पा) यांनी कृष्णा सहकारी बँकेची स्थापना केली. य. मो. कृष्णा सहकारी साखर कारखान्याचे चेअरमन डॉ. सुरेश भोसले यांच्या मार्गदर्शनाखाली कार्यरत असलेल्या कृष्णा बँकेच्या ३१ मार्च २०२२ अखेरच्या एकूण ठेवी ४८८ कोटी ३० लाख रूपयांच्या असून, २५१ कोटी १३ लाख रूपयांचे कर्जवाटप करण्यात आले आहे. बँकेचा एकूण व्यवसाय ७३९ कोटींच्या वर झाला असून, नेट एन.पी.ए. शून्य टक्के राहिला आहे. बँकेकडे ७० कोटी ७४ लाखांचा स्वनिधी असून, प्रती सेवक व्यवसाय ५ कोटी ७३ लाख इतका झालेला आहे. सर्व तरतुदी व कर वजा जाता बँकेने ७ कोटी ९७ लाख एवढा निव्वळ नफा कमाविला आहे.

गेल्या २ वर्षांपासून देशात वेगाने फैलावलेल्या कोराना साथीच्या काळातही बँकेने सर्व संचालक मंडळ, सभासद, खातेदार व कर्मचाऱ्यांच्या सहकार्याने चांगली कामगिरी करत, व्यवसाय वृद्धीचे उद्दिष्ट गाठण्यात यश मिळविले आहे. बँकेने ग्राहकांच्या सेवेसाठी एटीएम सुविधा, एस.एम.एस. बँकींग, ई-कॉमर्स, आर.टी.जी.एस./एन.ई.एफ.टी., एन.ए.सी.एच्., लॉकर्स यासारख्या अत्याधुनिक सुविधा सुरू केल्या आहेत. तसेच सातारा, सांगली, कोल्हापूर व पुणे या ४ जिल्ह्यात १९ शाखांच्या माध्यमातून विनम्र व तत्पर सेवा देणाऱ्या या बँकेने सुरू केलेल्या एटीएम सेवेचा लाभही ग्राहकांना मोठ्या प्रमाणावर होत आहे. बँकेच्या विविध ठेव व कर्ज योजनांचा तसेच अन्य सुविधांचा लाभ लोकांनी घ्यावा, असे आवाहन चेअरमन डॉ. अतुलबाबा भोसले यांनी केले आहे.