जयंत पाटलांची तटकरेंना मिठी ; दोघांची भेट कॅमेरात कैद; जयंत पाटील म्हणतात मी पवारांबरोबर ठाम ; एक गट सत्तेत, दुसरा विरोधात ; राष्ट्रवादीत नेमकं चाललय काय? राज्यात चर्चेला उधाण ;

वेध माझा ऑनलाईन। महाराष्ट्राच्या राजकारणात सध्या काय सुरुय? असा प्रश्न सर्वसामान्यांना पडतोय. कारण एकाच पक्षाचे दोन गट सत्तेत आणि विरोधात सहभागी होतात. विशेष म्हणजे दोन्ही गटाचे दोन मोठे नेते विधान भवनात एकमेकांना भेटतात. ते एकमेकांशी अतिशय मनमोकळेपणाने आणि हसत-खेळत गप्पा मारतात. त्यामुळे राजकीय वर्तुळात वेगवेगळ्या चर्चांना उधाण आलंय. खरं नेमकं काय आहे? तेच कळायला मार्ग नाही, अशी चर्चा आता सध्या सर्वत्र सुरु आहे. सत्ताधारी राष्ट्रवादी काँग्रेस पक्षाचे नेते सुनील तटकरे आणि विरोधी पक्षाचे प्रदेशाध्यक्ष जयंत पाटील यांची आज भेट झाली. विधान भवनाच्या कॉरिडॉरमध्ये दोन्ही नेत्यांची भेट झाली. यावेळी दोन्ही नेत्यांनी गळाभेट घेतली. तसेच दोन्ही नेत्यांमध्ये छान गप्पाही रंगताना दिसल्या. त्यामुळे अनेकांच्या भुवया उंचावल्या.

सुनील तटकरे आणि जयंत पाटील यांची भेट आणि त्यांचे गप्पा मारत असतानाचे क्षण कॅमेऱ्यात अचूकपणे कैद झाले आहेत. एकमेकांचे राजकीय विरोधक असलेले हे दोन्ही नेते अतिशय मित्रासारखे हसत चर्चा करत होते. त्यांच्याकडे पाहून ते एकमेकांचे राजकीय विरोधक आहेत, असं वाटणार देखील नाही, अशी चर्चा सध्या राजकीय वर्तुळात सुरु आहे. दरम्यान, या भेटीवर जयंत पाटील यांनी प्रतिक्रिया दिलीय. या भेटीचा कुणीही राजकीय अर्थ काढू नये, असं जयंत पाटील यांनी सांगितलंय. मी राष्ट्रवादी काँग्रेसचे अध्यक्ष शरद पवार यांच्यासोबत मी ठामपणे उभा आहे, असंही जयंत पाटील म्हणाले.

दरम्यान जयंत पाटील यांना सत्तेत घेऊन मंत्रिपद देण्याची भाजपाची तयारी असल्याचे समजते

या सर्व विषयावर जयंत पाटील यांनी महत्वाची विधाने केली आहेत

"राष्ट्रवादी काँग्रेस पक्षासोबत ठाम आहे. पवार साहेब सांगतील तीच आमची दिशा आहे असे त्यांनी स्पष्ट केले. आता अजित पवारांसोबत गेलेले ६ आमदार हे माझ्या सोबत लॉबीत बसलेले होते. ३ आमदारांनी माझ्या सोबत जेवण केले. याचा अर्थ काही वेगळा होत नाही. त्यामुळे कोणीही गैरसमज निर्माण करु नका," असेही पाटील यांनी सांगितले.